Fabrikante di avion Fokker tei atrobe. Esaki De Telegraaf ta skibi. Despues di 14 aña ku e kompania a bai fayit, el a lanta atrobe. Minister di asuntunan ekonómiko, Van der Hoeven, a pone 20 mion di euro disponibel pa esaki. E invershonista Jaap Rosen Jacobsen i kompania Stork konhuntamente ke lansa Fokker 100 NG, algu ku lo mester sosodé den e añanan benidero. E avion akí mester ta mas silensioso i gasta ménos kombustibel ku e kompetidornan.

Emile Roemer a bira e lider nobo di frakshon di partido sosialista SP den parlamento hulandes. Den  e matutinonan a sali hopi potrèt di e kabesante nobo.

De Volkskrant ta kere ku a papia sufisiente di Bijlmer. Huntu ku Elvira Sweet, presidente saliente di konseho munisipal di distrito Zuid Oost, e korant ta hiba e lesadó na partinan ku sí ta bunita na Amsterdam Zuid Oost. Manera toko Kai Hing, e promé toko den Zuid Oost, pero tambe e 'boerderij' yamá Langerlust, un finka na Gaasperplas.
 
Bèlmentu ku telefòn selular lo bira muchu mas karu. Kompanianan di telefòn selular lo stòp di kobra pa sekònde i lo kuminsá kobra pa minüt. Esaki Financieele Dagblad ta skibi. Klientenan ku papia un minüt ku un sekònde serka kompanianan manera KPN, Vodafone òf T-Mobile lo tin ku bai paga pa 2 minüt, enbes di 61 sekònde.
 
Huesnan ta duna kastigunan ménos severo debí n'e krísis ekonómiko. Ku esaki nan ke evitá pèrdida di trabou pa delinkuentenan. Esaki AD ta skibi. Segun Margo Somsen di Raad voor de Rechtspraak, esta e órgano pa hurisdikshon na hulanda, e redukshon di kastigu ta konta pa kasonan chikí so. 
 
Lareina Beatris a gana basta sèn na bolsa. Pa promé biaha tin bista riba invershonnan di Lareina. Esaki De Volkskrant ta skibi. Entre 2005 ku 2007, Beatris a invertí miones di euro den kompanianan asiátiko. Su mahestat a invertí plaka via banko merikano JP Morgan. E la kumpra akshonnan pa 24 dollar 50, i e tabata bende esakinan pa muchu mas tantu sèn. Kuantu ganashi Lareina tabatin no ta kla.