Te ainda gabinete ulandes no tin fin di keda kla ku asuntu di e mishon na Uruzgan, pero e militarnan mes sí sa kaba: nan ke keda Uruzgan! Algemeen Dagblad ta skibi ku 94 porshento di e sòldánan ta respaldá e mishon, mientras ku 75 porshento ke keda mas tempu na Uruzgan, un provinsia di Afganistan. Un di e motibunan mas importante ta ku e militarnan ta husga ku nan trabou no ta kla ainda.

De Volkskrant tambe ta skibi di Uruzgan. Redakshon di e korant a kòmbersá ku general Simon Levey na Kabul, kapital di Afganistan. E general ta karga responsabilidat máksimo serka OTAN pa konstrukshon i entrenamentu di ehérsito afgano. OTAN ta e aliansa militar di paisnan nort-atlántiko. Si en kaso Hulanda disidí di bandoná Uruzgan definitivamente fin dje aña akí, e or'ei OTAN ta ofresé un alternativa. Entrante òktober, Levey mester di mil entrenadó pa instruí sòldá afgano. Pa esaki por hasi uso di servisio di militarnan hulandes.

Den De Telegraaf tambe por lesa un reportahe tokante Afganistan. Na 2007 a skòrs dos spiòn ulandes n'e pais durante un investigashon di supuesto outo-enrikesementu. No por a prueba e akusashonnan, pero nan operashonnan sí a pega. Esaki a pone ku por lo ménos un sivil afgano a fayesé, asina ta sospechá antó. A tira un kasike mata dilanti porta di su kas, pasó el a alohá un agente sekretu hulandes e tempu ei.

Salu pa stroi riba kaminda a kaba: bùs di skol a kai for di viadukto. Algemeen Dagblad a bin ku e notisia akí. Eskases di salu pa stroi ta keda un problema na Hulanda. E kos akí a kondusí na hopi aksidente ayera. Un vèn di skol ku ocho mucha ku hèndikèp físiko i mental a slep kita for di kaminda bai kai riba viadukto di A37. Kuater alumno i e shòfùr a keda eridá i mester a interná nan na hòspital. Un di e alumnonan ta den kondishon grave.

Den Trouw por mira potrèt di Nelson Mandela pará ta hari ku smak ku un glas di shampaña den man, rondoná di entre otro su èks kasá Winnie Mandela. Djaweps último a saka e potrèt na momentu ku Mandela, di 91 aña di edat, tabata selebrando su liberashon den seno privá. Ya ta 20 aña pasá ku a lagué sali for di prizòn, despues ku el a bai será 27 aña largu na Robben eiland na Suráfrika.

Den su suplemento 'De Ideale baan', o sea e djòp ideal, Trouw ta skibi ku Kòrsou ta buskando un direktor di skol kristian. E motibu pakiko e asosiashon di enseñansa protestant kristian ta buska hende na Hulanda ta ku na e isla ta difísil haña un kandidato adekuado, asina Maghalie van der Bunt, sekretario di direktiva di skol protestant kristian a splika Trouw.