Joran van der Sloot ta sigui dominá notisia na Peru. Kasi tur korant peruano a publiká un òf mas portèt dje sospechoso di asesinato riba nan promé página. Por mira kon ta pone Van der Sloot bistí ku un chaketa di antibala, den un outo di polis rumbo pa kapital Lima. AD a papia ku ruman hòmber dje studiante asesiná Stephany Flores. Segun e ruman hòmber akí e tim di polis ku ta investigá lo finalisá denter di algun siman ku e kaso debí na e tantísimo pruebanan ku tin na disposishon.

Despues di Gresia, Spaña i Portugal ta parse awor ku tambe Hungria tin problemanan finansiero severo. No ta promé biá ku e pais ost-oropeo akí tin problemanan finansiero. Pero segun Het Financieele Dagblad Hungria ta awor den un zona di peliger pa motibu di málpago. E moneda di Hungria, florint, a baha den balor ku kasi sinku porshentu. Konsekuensha dje alarma di debe aki ta ku bolsanan, ku a kaba kuminsá rekuperá poko poko, a bolbe kai den otro atrobe.

Titular prinsipal den De Volkskrant ta bisa: Forsa di kompra ta baha di parti derechista i subi tin biá bastante di banda iskierdista. Ofisina di investigashon Nyfer a kalkulá pa De Volkskrant e efektonan dje forsa di kompra pa seis famia modelo. Kobradónan di ònderstant ku dos yu lo haña serka PvdA i SP mensualmente entre 60 pa 90 euro aserka. Un mama ku ta kobra ònderstant tin serka CDA, D66, VVD i PVV ménos pa gasta.

Normal ta Ofisina Sentral di Planifikashon ta kalkulá e forsa di kompra pa elekshonnan nashonal. Pero pa falta di tempu nan no por a hasi esaki e aña akí. E resultadonan no ta mashá sorprendente. De Volkskrant ta skibi mas aleu ku un pareha penshonado ku un penshun chikí, tin'é mihó serka SP. Serka Groen Links parehanan ku dos sueldo lo haña 83 euro pa luna aserka, i VVD i CDA ta tene konsiderashon ku prinsipalmente esnan ku entrada haltu.

Un pareha indio ta eksihí di wes un tèst di DNA pa stipulá si nan yu hòrtá, ta un yu adoptá pa un pareha hulandes. Trouw ta skibi e informe akí. Nan ke kontakto ku e mucha hòmber si e ta na Hulanda. Ta pa promé biá ku mayornan biológiko di un otro pais, ta buska nan rason na Hulanda. Te ku awor e mayornan hulandes a ninga koperashon.

Hulandesnan tin un bokabulario grandi di palabra na ingles. Pero nan pronunsiashon ta hopi biá asina malu, ku e ta desbentahoso, durante negosashonnan den polítika òf den komèrsio. Asina un lingwista ta bisa den AD. Ingles deformá ku palabranan hulandes ta malu pa kredibilidat djesun ku ta papi'é. Muchanan na skolnan básiko mester haña lès di ingles di hende ku ingles ta nan lenga materno. Ya asina ta drecha abilidat dje muchanan den e idioma stranhero, segun AD.