Korantnan na Hulanda ta yen di notisia di Agnes Kant, dirigente di SP ku a tuma despedida di su partido. AD tin un potrèt di dje tur emoshoná, ku e titular: SP dekapitá despues di despedida di Agnes Kant. Den editorial di De Telegraaf tin pará ku su retiru tabata inevitabel. Su entusiasmo ta sigur, ma ta komosifuera e lider di e di tres partido di Hulanda semper tabata kore rònt den di sinku spit antó ku mal beis tambe. Miembronan di frakshon di SP ta okupá ku suseshon di nan lider. Awe lo divulgá ken lo tuma mando di e partido.

Pero tin mas notisia despues di elekshonnan munisipal. Segun De Telegraaf ta kritikando promé minister Balkenende mas i mas den seno di su partido CDA. E korant ta skibi ku e departamentonan provinshal ta yama Balkenende bin duna kuenta i rason dje mal resultado elektoral. Ta ferwagt un diskushon riba su liderato.
Trots op Nederland, e partido di Rita Verdonk ta haña atenshon den prensa. E partido a gana 62 asiento. Segun Trouw ta na Den Helder so TON, manera nan ta yama e partido, tin chèns di goberná. Einan e partido a bira number dos.

Reshèrshi nashonal a indagá famia di èks minister Remkes sekretamente, segun De Telegraaf. Un primu di Remkes, segun e korant antó, tabata kompletamente involukrá den kontrabanda i labamentu di plaka for di Nort Korea. E fail ta na parkèt nashonal i mester bai wes ainda.
E tempu ei Remkes mes tabata minister di Asuntunan Interior i ta p'esei e investigashon tabata sumamente intensivo. E polítiko di VVD ta bisa den deklarashon pa e korant ku e ta nuá ku su primu. E no ke bisa si a inform'é di investigashon di su primu, tempu k'e tabata minister.

Riba e página di ekonomia den De Telegraaf por lesa reportahe di wèlga di trahadónan di limpiesa."Mi tin miedu pa nan no kitá'mi", un trahadó ta bisa, 'pero mi ta haña ku hendenan mester sa kon trata trahadónan den limpiesa. Ke men mi ta konta tur kos numa i menta nòmber."Segun Bont di trahadó FNV ultimo simannan un mil trahadó di limpiesa a partisipá na akshon di protesta. Un porsentahe chikí, pero ta promé be ku e trahadónan aki ta para trabou asina largu.

Un komentario den Trouw ta trata di un guera abierto entre Nederlandse Bank i AFM pa kuent'i funshonamentu di e eks kabes di DNB, Gerrit Zalm. Segun e korant e guera ta tira un bista alarmante den kushina di e vigilantenan. Komishon Scheltema a trese afó ku nan dos tabata pensa kompletamente distinto di Zalm, i e ora ei Scheltema a hala e opinion negativo di AFM un banda.
Segun Trouw e asuntu ta hopi dañino pa outoridat di AFM, ku ta nobo ainda. I dañino pa reputashon di e vigilansha: Nederlandse Bank i Noud Wellink tambe ta sufri, pasobra ainda ta parse manera kos ku e supervisor kera tapa e asuntu.

De Telegraaf ta duna palabra na esnan ku ta pro i kontra paga pa kada kilometer ku kore. Parlamento a deklará e plan komo kontroversial. Pero ainda e sistema no a bai "nòkout". 'Lástima', e parlamentario di VVD Aptroot ta bisa. Si ta p'é, elekshonnan na yüni lo kaba di mata e plan aki. Parlamentario Emile Roemer di SP ke ku pago pa kilometer a kaba kaba. I e ta kontentu. "Esaki lo a kousa un desaster pa Liña di Betuwe", asina e ta bisa.