Gerd Leers, miembro prominente di partido CDA a skapa den su hubentut djun pastor ku kier a abuzá di dje seksualmente. Leers, èks alkalde di Maastricht a bisa e kos akí den un entrevista ku Algemeen Dagblad. "Tabatin dje padernan ei ku nesesidat seksual. Mi a mir'e kos ei, pero mi mes no a pasa'den", asina Leers a bisa Algemeen Dagblad. Mas aleu e ta konta ku'n biá el a skòp un bruder den su kil'i karson ora ku e kier a mishi kune. Su fe no a sufri k'e eksperiensha akí, ounke ku e ta pèrmití su mes krítika duru riba Iglesia Katóliko. "Kon bo por husga hende tantu asina den e parti moral, siendo ku bo mes ta tolerá e tipo di kosnan akí? ", asina èks alkalde Gerd Leers di Maastricht a bisa den Algemeen Dagblad.

Job Cohen, aspirant kabesante di lista di PvdA lo laga su prekursor Wouter Bos konseh'é riba tereno di ekonomia. Cohen mes a bisa e kos akí den un entrevista ku NRC. Despues ku a postul'é komo kandidato pa enkabesá lista di PvdA, a drenta pregunta si Cohen sa sufisiente di ekonomia, ya ku ta hurista e ta. "E kos no t'asina kompliká: tur relato tin algun liña general. Bo mester sa presis ta kuá", segun Cohen.

De Volkskrant ta wak ròl di futbolistanan sürnam den selekshon ulandes. Esaki relashoná ku selebrashon di hubileo di 50 aña di Humphrey Mijnals komo e promé Sürnameo den ekipo Oraño. Romeo Zondervan ku a sigui Mijnals komo international na 1981, ta denominá su prekursor komo un hòmber impreshonante. Pero e no ta'tin e idea ku e ta sigui pasonan di Mijnals sí. De Volkskrant ta konstatá tambe ku e kantidat di Sürnam ku tin parti den selekshon ulandes a baha último añanan, despues djun temporada di apogeo ku sinku futbolista sürnam na 1996.

Mayoria ehekutivo di kompanianan grandi pafó di sektor finansiero a risibí un suma mas grandi di bones di prestashon den último aña. Un análisis di NRC Handelsblad ta indiká e kos akí. E korant a studia relatonan anual di kasi 50 kompania. Den sektor finansiero ta kompania di seguro Delta Lloyd só a paga bones. Esnan ku a duna bones bai gol ta Heineken, kas editorial Wolters Kluwer i Philips. Presidente di hunta direktivo di Heineken a risibí un bones di asta 86 porshentu mas haltu ku nòrmal, o sea un suma di 1.1 mion di euro.

Kuerpo sentral di servisio di polis (KLPD) a haña dos webu di Pasku yen di kokaina den un outo riba karetera A2. "Nan tabata un kilo i mei kada un i nan tabata skondí den un saku di plèstik", asina bosero di polis a bisa den deklarashon pa De Telegraaf. A detené e outomobilista despues ku a detektá su number di outo ku'n aparato spesial ku ainda e debe un but di 1200 euro. A gara pasahero dje outo tambe umbes ya ku polis merikanu ta busk'é en konekshon ku narkotráfiko.

Algemeen Dagblad ta antisipá selebrashon di Pasku grandi. Den e kaso akí ta trata di Pleasure Paas Party na Rotterdam. Esaki ta bai tae 27 edishon di e evento musikal, pero no ta tur hende sa di dje, asina e korant ta skibi. Tur esaki siendo ku ta artistanan di renombre lo subi stage. Personahenan manera e rei di Dancehall, Sean Paul anto e strea latino Omega. E fiesta a lanta tempu ku'n ta'tin nada otro riba tereno di músika latinomerikanu i karibense. Pleasure Magazine, e revista ku te dia djawe ta optenibel gratuitamente, a disidí numa e tempu ei p'e mes organisá un evento.