Korantnan ta yen di e fleksibilashon di e prohibishon di bula. De Telegraaf ta kontentu: "Porfin nos ta bula atrobe." I tur esaki danki na preshon grandi ku gobièrnu hulandes a pone durante deliberashonnan oropeo, e korant ta skibi. Pasaheronan ku tin un teket pa buelo nobo ta haña preferensha. Pasaheronan ku tabatin teket pa buelo ku a kanselá mester spera ku ta sobra un stul pa nan òf ku otro pasahero ta duna nan nan stul boluntariamente.
Nederlands Dagblad tambe ta skibi tokante e kitamentu di e reinan largu. Ta stul bashi so por bai pa pasahero ku a keda pegá. Ma e kompania Euroclaim, ku ta yuda e pasaheronan kobra daño, ta suponé ku den dos tres dia tur hende lo ta na kaminda. Hopi hende a buska medionan di transporte alternativo òf a kanselá nan biahe. Asina ta ku tin mas stul bashi ku a spera.
De Volkskrant ta duna palabra na minister demishonario Eurlings: "E situashon di un espasio arial será no por dura un sekònde mas largu. E daño ekonómiko ta enorme kaba. A midi ku e situashon ta sigur awó."

"Emoshon seka desalohamentu di tèmpel", asina De Telegraaf ta titulá. E tèmpel di hindú yamá Devi Dhaam na Amsterdam Zuid Oost a keda desalohá ayera. E motibu ta konstrukshon nobo planeá den e stadsdeel. Riba potrèt por mira un hende muhe kende ku hopi pena ta tuma despedida di estatuanan di marmer di sinku dios hindú. "E kos ta teribel. Hendenan ta sinti nan mes pèrdi i sin speransa", asina bosero Salwiet Balwantgir ta bisa.

De Volkskrant ta skibi tokante di e konsepto di e lista di kandidato di PvdA. "Albayrak samsam ku Cohen" e korant ta titulá. Un desapuntashon ta e lugá di e spesialista di Antia John Leerdam, e ta na number 33. Esun nobo di mas haltu ta Ahmed Marcouch, èks presidente di e distrikto munisipal Amsterdam Slotervaart.

Algemeen Dagblad a deskubrí un asuntu grandi di dopen. Sigur tres deportista hulandes ta sospechoso den e asina yamá 'kaso di Wenen". Herman Ram di Outoridat di Dopen no ta menta nòmber ainda. E ta na punto si di kuminsá 'un proseso di orden di un kaliber pisá'. E sospechosonan lo a tuma transfushon di sanger na un laboratorio di dopen na Wenen.
Den e investigashon a tende e èks siklistanan Michael Boogerd, Thomas Dekker i Michael Rasmussen komo tistigu. Ram no ke bisa for di kua ramo di deporte e sospechosonan ta bini. El a konta AD si ku 'siklista ta hunga un ròl importante'.

De Volkskrant ta skibi tokante e akshon grandi di limpiesa na Shanghai, kaminda aki tres aña e Eksposishon Mundial ta kuminsá. Polis ketu ketu a duna orden ku prostitutanan mester skonde. Seis luna largu e siudat mester ta limpi i desente i esaki ta trese situashonnan kómiko. Di repente tur kaminda den e siudat kortina di ròl metáliko ta baha dilanti di e miles di bentananan kaminda prostitutanan ta traha. 'Será pa motibu di renobashon', tin pará. Tin di nan ainda ta habrí pero lo no dura muchu. Ofisialmente prostitushon ta prohibí pero tur hende sa ku den barberia kasi no sa pela. Ademas tin damanan ku masha tiki paña bistí ta traha den kas di baño i bar di karaoke.