Den Spits por lesa historia di Esther, un gulidó di bolita antiano di 26 aña di edat. Na diferente okashon el a transportá droga di Suramérika pa Hulanda. Ku esaki e la gana basta sèn. E mes ta bin di un ambiente sosial kriminal. "Antes mi no tabata bon mucha. Mi no tin nada kontra kriminal. Mi mes ta un", asina el a bisa den Spits. Nan a gar'é na Venesuela. Na lugá di 10.000 euro kèsh den saku el a risibí 8 aña di prizòn.

Pa medio di un tratado di ekstradishon a redusí e kastigu akí ku dos aña. Pero 6 luna den prizòn na Venesuela ainda ta den su kabes. E tin pesadia di un wèlga di hamber i di disturbionan kaminda 300 muhé a pega nan kolchon na kandela. Pero tambe tabatin músika, baile, alkohòl i kokaína. "Tur esakinan mi no por lubidá", segun Esther. Entre tantu e ta kobra ònderstant na Hulanda.

Un píldora ku mester remplasá kimoterapia. Pa algun pashènt ku kánser na pulmon, e píldora akí ta un bon alternativa pa kimoterapia pisá. E píldora ta fria doló mas mihó, i tin ménos efektonan sekundario. Esaki Trouw ta skibi. For di aña pasá e pildora akí ta riba merkado, i for di ayera seguronan ta kubrié.

Harry Groen, dosente di malesa di pulmon na Hòspital Universitario di Groningen, ta di opinion ku e píldora ta un atkisishon, pero alabes e ta atvertí pa espektativanan muchu haltu. "Despues di tratamentu di un aña ku e píldora ta 25 porshentu di e pashèntnan so a kura di nan malesa. Esaki sigur no ta 100 porshentu. Pero en todo kaso e ta mas mihó ku e terapia regular", segun Harry Groen

Basha flur ta trabou duru. Pero ponementu di e asina yamá 'zandcementvloertje', esta flur di tera i semènt ta kasi ímposibel. E trabou ta asina pisá, ku inspekshon di labor tin pensá di prohibí ponementu di e flur aki na man. Pániko serka negoshantenan! Bashamentu di e tipo di flur akí manualmente ta algu mashá nòrmal. De Telegraaf a habri awé ku e notisia aki.

Alternativanan pa e tipo di flur akí ta mashá kostoso, segun nogoshinan di konstrukshon. Pero Magda van Vetten di inspekshon di labor no ta tin kompashon. "Nos ta pèrmití ponementu di e tipo di flur akí solamente si no tin otro posibilidat. Por ehèmpel ora ta trata di monumentonan istóriko. Pero den otro kasonan mester hasi e trabou akí menos pisá", segun inspektor van Vetten.

Ayera 10 Merikano a presentá dilanti mesa bèrdè na Haiti. Esaki pa motibu ku nan kier a bai ku 33 mucha for di e pais. "Sekuestro", asina polis a bisa. Pero e grupo tabatin e mihó intenshonnan. Esaki Nederlands Dagblad ta skibi. Pero e ta un dilèma: Kiko ta e mihó yudansa pa muchanan na Haiti? Adoptá nan den eksterior, o yudansa na nan mes país?

Pa e mayornan esaki no ta klaro ainda. "Mi mayornan a muri, mi kasa no tei. Entregá mi yunan sikiera lo duna nan un chèns. Esaki segun un mama di 40 aña di edat. "Mi úniko temor ta ku nan lo lubidámi, pero esaki no ta influenshá mi desishon." Un dama di 44 aña di edat ta bisa: "Mi ta pensa sí kua yu mi ke entregá." Asina dramátiko e situashon ta. Esaki segun Nederlands Dagblad.

E konsekuensianan di e plannan nobo di presupuesto di presidente Obama pa siensia espasial merikano, a trese hopi reakshon den medionan di komunikashon. De Volkskrant ta skibi tokante esaki. Algun ekonomista ta kontentu, pa motibu ku e plannan lo spar hopi sèn. Hopi fanátiko di siensia espasial a keda defroudá, pa motibu ku un biahe pa luna lo no tuma lugá mas.

Kongreso mester aprobá e plannan aki ahinda. Kritikonan ta atvertí Merka, ku nan lo bai kai atras. Rusia ku China lo bai nan dilanti. Direktor di NASA, Charles Bolden, a bisa ku pa motibu di e proyekto pa bai Luna, Merka a deskuidá invershonnan den téknologia. Eskinan mester hiba e país dilanti.