Naturalmente e matutinonan ta dediká masha atenshon na e proposishonnan di ekonomisashon ku gruponan di trabou di ámtenar hulandes a presentá ayera. Portada di De Volkskrant a sali asta sin potrèt. E matutino tin un titular den anchura ful di e korant ku ta bisa: Tur eskoho lo kousa doló. Djei e korant ta dediká kuater página na e proposishonnan di ousteridat.

De Telegraaf ta kalifiká e proposishonnan komo un tómbola. E matutino ta teme e desasternan ku por tuma lugá si kuminsa tòrnu na dedukshon di interes di hipoteka. Si esei sosodé, merkado di kas ta basha bini abou. Doñonan di kas lo ripará kon balor di nan propiedat ta baha ku mas o ménos 11 porshento, esaki segun investigashon di un di e gruponan di trabou di ámtenar.

Algemeen Dagblad ta informá den su edishon di Rotterdam ku mayan lo manda e di 10.000 banki di skol pa Sürnam. Kada aña fundashon Schoolhulpproject, esta proyekto pa ayudo di skol, ta hiba 10 kònteiner ku artíkulo pa skol na Sürnam. Shen i piku boluntario di provinsia Zuid Holland ta kolektá e materialnan pa skol. E di 10.000 banki di skol ku nan ta manda, ta forma parti di e di 28 transporte ku e fundashon ta organisá. Pero e fundashon mes no ta selebrá esei. 'E gratitut di e muchanan ya kaba ta un regalo riba su mes', asina presidente di e fundashon ta bisa. Nan ta spera ku aki 5 aña nan lo a fasilitá tur skol na Sürnam ku bon material.

Den su suplemento di arte De Volkskrant ta elogiá David Bade, artista nasé di mayornan hulandes na Kòrsou. E korant ta skibi riba dos página kon Bade ta uza tur su kreatividat mas tantu posibel den su eksposishon retrospektivo yamá 'Catch of the day'. Elogiando e artista, De Volkskrant ta papia di 'un parada ku ta pasa plèchá'bo. Otro biaha di 'un parada ku no ta move', i tambe ku e artista ta swich di un tema pa otro.'

Aña pasá pasaheronan ku a biaha 2 di yüni ku trèin a skapa djun desaster, asina De Telegraaf ta skibi. E dia ei tabatin kandela den un tùnel. Awor ku a kaba di investigá e kandela, ta sali na kla ku e empresa di trèin i instanshanan di ayudo a traha duru sí, pero ku nan no a hasi esei konhuntamente. Loke a pone ku a dura tres kwart'i ora promé ku e trèinnan a sali for di e tùnel. Siendo ku ora tin kandela, e promé dies minütnan ta krusial.

E organisashon ku ta responsabel pa entre otro mantenshon di trèin i riel, a kere ku tabata trata di un simpel defekto na e sistema ku ta laga e rielnan kambia di direkshon. Brantwer na su turno sí tabata sa loke tabata pasando pero no ta tur instansha konserní a komprondé esei bon. Ta p'esei e investigadónan tin masha krítika riba e moda ku kosnan a kana. Nan ta haña ku e empresanan ku ta manehá trèin no ta organisá di tal forma, ku nan por aktua desididu i efikas den e promé dies minütnan di un aksidente. Danki Dios shushi ku tabata tirá den e tùnel i ku tambe a pega na kandela, a paga di su mes. Si no e konsekuenshanan lo tabata muchu mas grave, asina ta pará den De Telegraaf.

Diario De Pers ta konstatá ku kosnan a sali for di man ku prohibishon vigente pa sierto área. Personanan ku ta okashoná molèster no tin mag di drenta mas den stashòn di trèin, pakus, horeka, òf sierto kaya. Pero ta empresanan privá di seguridat òf trahadónan ku no ta den servisio di gòbièrnu ta enkargá ku mantenshon di e reglanan. Anto esei ta pone ku tin e riesgo ku kosnan ta bai pa loko.

Na Den Haag por ehèmpel ya kaba 1.500 hende no tin mag di ta na un sierto lugá. Pero ta hende ku ta traha pa kompania di seguridat so tin mag di wak potrèt di e 1.500 hendenan ei. Empresanan ku no tin empleado di seguridat den servisio no por rekonosé e 1.500 hendenan. Pa no papia mes di ki forma un vigilante ta bai kòrda tur 1.500 kara, asina De Pers ta informá ku su estilo poko tribí di semper.

Hopi biaha pashèntnan mester warda muchu largu riba indemnisashon di daño den kaso di fayo médiko. Nan tin di warda mas largu ku víktimanan di  tráfiko por ehèmpel. Kompanianan di seguro ta tarda mashá pa paga ora ta trata fayo médiko, asina De Volkskrant ta skibi. E kompanianan ta tarda asina tantu, ku pashèntnan ta bira víktima di e situashon i ta p'esei finalmente nan ta bai di akuerdo ku un montante ménos grandi di kompensashon di gastu médiko.