Biaheronan drumí riba kòt, tapá ku dekel kòrá. Tambe awe por mira e potrètnan akí di biaheronan pegá na Schiphol riba portada dje korantnan. Por lo pronto no ta yega un fin na e káos den e tráfiko aéreo di Oropa. Espasio aéreo di Hulanda ta keda será henter dia.

Den Algemeen Dagblad nos ta lesa ku en todo kaso tin ún bario na Hulanda ku no ta tristu dje echo ku aviònnan ta na tera. Na Zwanenburg djis serka di Schiphol, ta reina un trankilidat. Normal ta bula dos shen mil aviòn pa aña riba e bario. Awor pañanan ta kologá na waya i portanan di balkon ta hanchu habri. Habitante Thecla van der Wal ta bisa den AD: "Ta manera mi ta un tiki na vakansi."

Pa Keukenhof kaminda por wak flornan bunita i tambe pa museo Van Gogh e seramentu di Schiphol tin mag di dura largu. Den Trouw un bosero di Keukenhof ta bisa ku nan a haña dies te binti porshentu mas bishitante. Tambe otro lugánan turístiko na Hulanda manera Volendam i Zaandam ta hañando basta bishitante.

Otro notisia den korantnan di awe: De Volkskrant ta den posishon di un análisis di Ministerio di VROM. For dje análisis a sali na kla ku dos tersera di Hulandesnan ta na fabor di energia nuklear. Un gran ideal pa Hulandesnan ta energia duradero, manera molinanan di bientu i panelnan solar. Pero tòg un gran mayoria djesnan entrevistá tin pregunta tokante energia nuklear. Prinsipalmente e miedu pa aksidentenan ta grandi. Pues promé Hulanda hasi na gran eskala uso dje di energia nuklear, nan mester ta berdaderamente sigur, segun De Volkskrant.

Èks minister di Finansa Ruding ta bisa den De Telegraaf ku Wouter Bos a warda muchu largu pa tuma medidanan di ekonomisashon. Segun Ruding Bos a pinta e situashon ekonómiko muchu bunita, tantu den e akuerdo di gobernashon komo durante e situashon di krísis. Segun e èks mandatario finansiero, polítikonan tin miedu pa tuma desishonnan impopular pa miedu ku nan ta pèrdè voto.

Hende muhé ta disidí unda ta bai ku vakansi, asina De Telegraaf ta skibi. Den kaso di tres kuart di biahenan ta e hende muhé ta disidi e destinashon i akomodashon. Segun e investigashon nan ta buska oranan largu riba enternèt pa un bon destinashon. Reim setenta porshentu ta buk online i binti porshentu ta bai un agensia di biahe.

I e reportero di krímen Peter R. de Vries mester paga sinku shen mil euro si e bolbe pasa imáhennan di e asesino di mucha Koos H. na televishon. Trouw ta informá esaki. Skondí a hasi e filmashon den un klinika di TBS. Tambe e emisoranan SBS i produktor Endemol mester paga. De Vries ta bisa ku lo e transmití, pero e no ta divulgá si e lo pasa e imáhennan.