Matutinonan hulandes ta duna hopi atenshon na e kambio di liderato den PvdA. De Volkskrant ta yena 4 página. 'Magistral', asina èks lider di VVD, Hans Wiegel ta bisa. Segun e, Cohen na kabes di lista ta un berdadero 'vote-getter'. Ed van Thijn, èks alkalde di Amsterdam ta pronostiká ku Balkenende lo pasa den difikultat. Pasobra segun van Thijn, awó Balkenende no por hunga papel di sirbidó leal mas.
 

Korantnan ta spekulá hopi riba konsekuenshanan ku despedida di Wouter Bos tin pa e lucha pa bira promé minister despues di elekshonnan pa parlamento ulandes, dia 9 di yüni próksimo. De Volkskrant a buta e siguiente titular: Cohen ta subi bai haltu den sondeonan. I De Telegraaf ta papia di un lucha entre gigante ku lo kuminsá entre Balkenende di CDA, Job Cohen di PvdA i Geert Wilders di PVV. Mayoria korant ta komprondé ku Wouter Bos a skohe pa dediká mas tempu na su famia i nan ta mira Job Cohen komo un bon posibel susesor.
 

Trouw i Financieel Dagblad a kritiká promé minister demishonario Balkenende den nan editorial. Asina Trouw ta bisa: Balkenende i Bos último tres aña no a logra terminá e mishon di nan gabinete, esta drecha stabilidat i pas sosial den e pais. Bos a saka su konsekuenshanan for di e fayonan aki. Mihó Balkenende hasi meskos, ainda no ta lat.
 

Asta na Merka e notisia di kandidatura di Job Cohen a plama. The New York Times ta informá riba su website ku "e alkalde popular di Amsterdam" tin bon chèns di bira promé minister di Hulanda.
 

De Volkskrant a pone komo titular: "Ta Eurlings i Bos ta kargadó di bandera pa un ola nobo di emansipashon?" E korant ta puntra ku ta di bèrdè mes e dos èks mandatarionan a sali for di polítika pa nan famia of pa ta politikamente korekto? "E paso di Bos i Eurlings ta kuadra ku e imágen di identidat kontemporáneo. No por bisa mas: "unabes bo ta polítiko, semper lo bo keda polítiko."
 

Presidente di e organisashon di doño di empresa VNO-CNW ta haña ku Wilders ta lastimá Hulanda enormemente. Bernard Wientjes ta bisa den un entrevista ku De Volkskrant: "E manera ku el a presentá su mes na London komo futuro promé minister di Hulanda i despues zundra e promé minister di Turkia Erdogan, t'un bagamunderia di marka mayó." Tòg Wientjes lo dil ku PVV si, si nan drenta gobièrnu. "Pero," e ta bisa den e korant, "nos ta rekomendá pa no traha nunka huntu ku PVV, esaki tin di aber ku nos posishon internashonal tambe."