E instituto forénsiko hulandes ya pa seis luna no ta tuma kaso di maltrato di mucha . Pa falta di kapasidat, ta keda sin usa prueba den sentenares di kaso. Asina De Volkskrant ta skibi. Na Hulanda tin solamente 4 médiko forénsiko ku ta speshalisá den maltrato di mucha. Segun investigashon di NFI i polis pa aña tin sinku shen kaso di maltrato severo di mucha kaminda tin nesesidat di investigashon forénsiko médiko.

Serbes lo bin daña menos lihé. Investigashon belgiko revolushonario lo perkurá pa por warda serbes dos aña largu sin e pèrdè sabor, kontal ku warde na un manera no muchu kayente. Asina Algemeen Dagblad ta skibi. Tin algun marka ku ya kaba ta keda bon te ku un aña, pero segun e investigadó belgiko despues di dos luna kaba bo ta sinti ku e serbes ta bai atras. Segun e investigadó mester di serbes ku por warda mas largu pa por kompetí ku otro bibida.

Algun studiante di Hogeschool voor de Kunsten, un skol superior di arte, a plak steker riba kosnan ku lo disparsé si Geert Wilders haña mando polítiko. Nan a laga drük e stekernan for di nan propio fondonan i ta manda nan den paki di ocho steker pa hende rònt Hulanda, asina AD ta skibi. E intenshon ta pa plak e stekernan riba e asina yama hòbinan iskierdista manera supsidio di arte, lokura di klima, kurso di adaptashon síviko gratis, ayudo di desaroyo i e emisora estatal iskierdista.

Miones di euro ku a kolektá pa e fondo di mucha Fundashon Childright posibelmente a keda gastá den kasino. E adikshon na hungamentu di plaka di e èks direktor di e organisashon di karidat ta hunga un ròl den esaki. Asina De Telegraaf ta skibi. Hustisia tin indikashon ku pa añanan largu sumanan grandi di plaka no a yega seka e muchanan sin porvenir den paisnan di terser mundu. E direktor aktual ta reakshoná sorpresá i ta konta e korant ku e no tabata na altura di e investigashon di polis.

No ta permití pa fris sélula ovular pa usa pa embaraso mas despues. E hòspital AMC pa motibu di investigashon sientífiko kera laga 200 hende muhe sali na estado di e manera aki.Pero e hòspital ta apelá e desishon aki pasobra e investigashon no ta sufisientemente fundá. E método pa fris ta solamente algun aña bieu i ademas e selulanan ovular ta relativamente grandi, loke ta hasi nan èkstra vulnerabel ora di fris. En todo kaso AMC ta apelá e kaso, segun De Volkskrant