Tur korant ta anunsiá morto di Hans van Mierlo, fundadó di D-66 na edat di 78 aña. Segun Algemeen Dagblad, Hulanda a pèrdè un di e politikonan mas sobresaliente.

Segun De Telegraaf, Hans van Mierlo no ta laga un herensia polítiko grandi atras. E korant ta di opinion ku komo minister, Van Mierlo no a logra hopi. I su vishon pa introdusí elekshon di alkalde no a desaroyá bon. Pero mas aleu ta skibí den De Telegraaf: "e ta prueba ku den polítika tambe bo mester tin personanan interesante ku tin karisma i ku ta ponébo pensa. Van Mierlo tabata un persona asina".

Na 1977 Van Mierlo tabatin un entrevista ku De Volkskrant. Su opinion tokante morto: No ta miedu pa morto, tampoko e tristesa ku bo no tei mas. Bo por reflekshoná so riba e personanan ku ta tristu pasombra bo no tei mas.

Segun Trouw for di dia ku Van Mierlo a drenta polítika, e ta'tin algu merikano. Ora D-66 a drenta parlamento di gòlpi ku 7 asiento, a yama Van Mierlo 'e di dos Kennedy'.

Padernan hulandes no a violá mucha solamente na Hulanda pero tambe na Sürnam. Esaki ta pará den Algemeen Dagblad. Viktima Marlène ta konta su historia den e matutino. E no ke pa lubida viktimanan di Antia i Sürnam. Obispu Willem de Bekkers, di obispado na Paramaribo ta bisa den Algemeen Dagblad ku tin mag di hasi investigashon. Pastor Joop Vernooij tambe ta bisa ku tin ku inisia un investigashon di abusu seksual na iglesianan na Surnam i Anitia. Vernooij a traha na Sürnam entre 1969 i 2001.

Esun ku bishitá un misa den obispado di Haarlem e wikènt aki, lo tende komo predikashi, un karta di obispu Jos Punt. Den e karta e ta reakshoná riba e kaso di abusu seksual den iglesia katóliko, asina De Volkskrant ta skibi. Punt ta atmití ku e ambiente no tabata bon den internatnan katóliko, di manera ku religioso por a violá mucha.

AD ta skibi tambe awe ku Antia ta abolí pena di morto. Presidente di Staten Pedro Atacho a anunsia esei. Nunka a duna e sentensia na Antia. Otro siman Staten ta konkretisá e desishon.

Den De Volkskrant por lesa ku Laura, e mucha muhe ku ke bai nabega su so rònt mundu, ta dal bai ku su propósito verano benidero. Su tata a anunsiá esaki. Laura tin 14 aña. Ta hopi tribí di e tata pa bisa algu asina'ki pasombra Laura t'e ahinda ta bou di supervishon. Wes ta disidi na yüli si tin ku prolongá e statùs akí. Na desèmber a haña Laura na St.Maarten despues ku su mayornan a pidi pa busk'é. E tabata preparando su biahe rònt mundu. Polis a poné bèk den avion rumbo pa kas.