Riba portada di De Volkskrant por mira un potrèt di Ronny Brunswijk ta duna hende man durante huramentashon di Granman di dje Paramakanonan, un tribu desendiente di katibu afrikanu ku a hui drenta selva na Sürnam tempu nan ayá. Huramentashon di e kasike a tuma lugá na Paramaribo. Bou dje potrèt por lesa: 'Ronny ta bin antó e ta sera pas ku tur hende'. E èks lider di gueriya ke bira presidente di Sürnam. Brunswijk ta partisipá n'e kontienda elektoral ku su partido ABOP i e no ta ekskluí niun hende, ni sikiera Desi Bouterse. Na luna di mei tin elekshon parlamentario na Sürnam.

De Volkskrant ta kere ku èks komandante di ehérsito, Desi Bouterse ta e figura estelar atrobe di elekshon benidero na Sürnam. E pregunta ta si e lo risibí sufisiente voto pa gara poder, mas aún mirando e keskes ku tin den seno di Nieuw Front. E sondeonan ta mustra favorabel sí p'e.

Rotterdam a kuminsá konta voto di nobo. Algemeen Dagblad a duna hopi atenshon na e elekshon pa konseho munisipal, ku a bai djun forma poko kaótiko n'e siudat ulandes na oria di Maas. E korant ta skibi ku awor ta drentando notisia rònt Hulanda di iregularidat ku a surgi durante elekshon pa konseho munisipal di siman pasá. Kemen di ku no ta na Rotterdam so tabatin fayo. Parse ku na Amsterdam, Den Haag, Dordrecht, Spijkenisse i Doetinchem tambe a laga hende drenta hòki di voto pareu, pa basha bala ku pòtlot kòrá. Ata awor Hilversum tambe ke konta voto atrobe, es mas: na Bronckhorst, provinsia Gelderland ta kontando nan di nobo pa di dos be!

Awe tambe De Telegraaf a dediká atenshon na aresto di Jan des Bouvries. Ta sospech'é di envio di faktura falsifiká pa Fisko, asina e korant ta skibi. Des Bouvries lo a entregá faktura ku sumanan di sentenáres di miles di euro na empresa di Evert Kroon, un komersiante di propiedat inmóbil. Segun De Telegraaf, Des Bouvries a diseñá interior di bibienda i yate privá di Kroon p'e mesun montante ku ta menshoná riba e fakturanan fiktisio.

Dor di manda e fakturanan pa empresa di Kroon, e por a kometé froude fiskal dòbel. Kroon por a pidi dedukshon fiskal riba BTW o sea Salestax di fakturanan di Des Bouvries. Fuera djesei e fakturanan di Des Bouvries a baha ganashi di Kroon, supuestamente antó. Parse ku Kroon a usa e táktika akí mas biá. Asina'kí e por a kometé froude fiskal di un mion i mei di euro.

Awe Metro a skibi di integrashon pa medio di abla di kaya. Investigadornan ta bisa ku e loke ta papia riba kaya ta trese un meskla di kultura, loke ta un forma bunita di integrashon. Metro a kòmbersá ku Negativ, un rapper na Amsterdam. E ta bas den kreatividat ku idioma. Su tekstonan di rèp ta un meskla di hulandes, papiamentu, marokano i ingles hephòp. Investigador De Rooij ta bisa den Metro, ku hopi hende ta pensa riba agreshon ora nan tende lenga di kaya, pero ku e idea ei no ta basá riba bèrdat.

De Pers tambe ta den ambiente di rèp awé. Es mas: e korant a pone potrèt djun gai ku djent'i oro i djamanta riba su portada. Riba e di tres página por lesa tokante trahadónan sosial na Amsterdam, ku ta rèp ku hóbennan problemátiko pa pone nan bèk rib'e bon kaminda. De Pers ta skibi ku kasi tur sentro di bario a yega di tene tayer di rèp pa hubentut marginá, no na Amsterdam so, sino na Utrecht i Rotterdam tambe. Gainan den sirkuito kriminal no tin tempu pa rèpmentu. Maarten Geerlings dje banda di rèp OVC di Utrecht sa duna tayer mas biá. E ta bisa ku pa e grupito ei sí no tin remedi.