A arestá Jan Des Bouvrie. A detené e diseñadó di interior di kas pasobra supuestamente e ta involukrá den un asuntu di froude den sektor di propiedat inmóbil, asina fuentenan digno di konfiansa a bisa De Telegraaf. Lo ta trata di un froude fiskal kaminda a hòrta por lo menos un mion i mei di euro di belasten. Ayera a arestá Des Bouvrie. Ministerio Públiko no ke konfirmá e notisia.

Katja Leenderts, e mucha muhé ku su tata a bai kune Estados Unídos aña pasá, ke keda einan. Asina e ta bisa den Algemeen Dagblad. Siman pasá un wes merikano a husga ku aña pasá Katja su tata a sekuestr'é for di  kurá di skol na Ede. Segun korte, Katja mester bai Hulanda bèk seka su mama. Pero e no ke bai. E siman aki su mama lo a bai busk'é.

Mas i mas hòmber ta kai víktima di trafikashon di hende. For di sifranan nobo di e Sentro di Kordinashon di Trafikashon di Hende ta sali ku na aña 2009 tabatin tres be mas tantu hòmber víktima di trafikashon di hende ku e aña anterior. Trouw ta raportá esaki. Ta trata di víktima ku ta traha den prostitushon, konstrukshon i agrikultura.

Dòkternan di aborto na Merka no ta sinti nan mes sigur i kasi semper ta biba ku miedu. Awe Merka ta selebrá dia nashonal di apresio pa dòkter di aborto. De Pers ta raportá esaki. Pero no tin fiesta pa dòkter Warren Hern. E ta tene bentananan di su klínika será; nan ta resistente tambe kontra bala di revòlver. Ta fanátikonan religioso ta hasi su trabou kasi imposibel. Mundialmente tin 46 mion di aborto ta tuma lugá pa aña, 20 mion di nan no ta sigur.

Ku hopi tehi Schiphol a tuma medida di seguridat mas severo den su tiendanan di produkto tax-free. For di ayera pasahero no por abordá mas ku bòter di awa, asina De Telegraaf ta skibi. Tambe lo kontrolá èkstra ora kumpra bòter di bibida. Motibu pa e medidanan ta e aventura di periodista Alberto Stegeman. El a smòkel un líkido dañino drenta Schiphol i a bash'é den un bòter di bibida ku el a kumpra den un tienda tax-free.

E material na Uruzgan no bal nada mas. Segun De Telegraaf, Hulanda ta bai haña un palu di miones di euro ora e militarnan hulandes sali for di Afganistan.