'Deroke den gremio di organisashon di yudansa pa desaroyo', ta titular ku por lesa awé den De Volkskrant. Ministerio di Asuntunan di Eksterior a disidí di kòrt'e kantidat di organisashon pa desaroyo ku mitar. AIDSfonds, fondo pa SIDA ta un dje pèrdèdónan. Stichting Vluchteling, e fundashon pa yuda refugiado ku hui bin Hulanda lo no risibí supsidio mas tampoko di gobièrnu sentral próksimo 5 aña. Direktor Tineke Ceelen a bisa lo siguiente den De Volkskrant: "No t'un drama, nos eksistensha no ta kore peliger, pero ta di lamentá sí pa esnan ku nos ta yuda, ya ku nos ta sali na interes di hende."

Tin mag di reklamá bones ku ehekutivonan a risibí  te sinku aña despues ku a paga nan. E kos akí ta pará den un proposishon di lei ku minister di Hustisia, Hirsch Ballin ta manda awé pa Tweede Kamer, o sea parlamento ulandes. E notisia akí a sali den Financieel Dagblad. Por kobra e bones bèk si ta pinta marcha real di asuntunan finansiero muchu bunita den e relato anual. Tweede Kamer a pidi pa tuma e medida akí.

E kantidat di TBS-er, o sea sentensiado na disposishon di estado, ta kada bes ménos, asina De Volkskrant ta informá. Aña pasá, esta na 2009 a bin 107 TBS-er nobo aserka, loke ta ocho ménos kompará k'e aña anterior i 76 ménos ku na 2007. Segun investigador Leo van der Geest e kantidat di TBS-er a mengua pa motibu ku ménos i ménos sentensiado ta ninga pa someté nan na un tèst sikolóhiko. Nan ta konsiderá TBS komo un forma kamuflá di kadena perpétuo o sea kastigu di bida largu, komo ku awendia tratamentu síkiko ta dura 12 aña i fuera djesei ta imponé un areglo severo di fèrlòf.

Tantu den Algemeen Dagblad komo De Volkskrant a sali un potrèt di despedida di Job Cohen komo alkalde di Amsterdam. 'Kabes friu i kurason ardiente', ta titular ku De Volkskrant a uza. Riba ambos potrèt por mira Cohen bandoná sala di konseho munisipal pa último biá antó, den kompania di su kasá, sintá den ròlstul.  

Trouw ta skibi ku UWV, e instansha ulandes enkargá ku pago sosial lo para búskeda aktivo di trabou pa hende ku ta kai bou di WAO, o sea  e areglo di pago sosial pa inkapasidat laboral permanente. Direktor ehekutivo Joop Linthorst di UWV ta bisa den deklarashon p'e korant ku e instansha di pago sosial ta pará ku lomba kontra muraya, ya ku mester ekonomisá drástikamente. Si esnan inkapas di traha més ke busk'un djòp antó nan mester di yudansa, nan por akudí libremente serka UWV.

Bruder di ambulans, kòndùktùr, bombero: tur ta hende ku ta traha den sektornan yen di riesgo di servisio di gobièrnu. Inspekshon laboral ta bisa ku apénas nan dunadó di trabou ta protehá nan kontra agreshon. E notisia akí a sali den Algemeen Dagblad. Mester bisa sí ku no ta algu ku nan ta hasi konsientemente. Si Inspekshon laboral papia seriamente ku e dunadó di trabou, nan lo tuma medida sí. E or'ei lo instalá bali hanchu di resèpsi por ehèmpel, ku botón di alarma.

No ta notisia fastioso so tin den De Telegraaf. E korant ulandes tin tópikonan liviano tambe tokante Pasku di Resurekshon por ehèmpel. Preis di webu di galiña ta pika e aña'kí, asina e korant ta informá. Hulandesnan ta paga un promedio di dos euro pa dies webu, siendo ku aña pasá esaki tabata 1 euro i 80 sèn. Parse ku tin eskases di webu riba merkado oropeo. Alemannan ta kumprando webu ulandes na gran eskala. Webu biológiko t'esun mas gustá pero mas karu tambe. Rib'e potrèt den De Telegraaf por mira mucha disfrasá di konènchi antó sintá na mesa di desayuno kolorido den ambiente di Pasku.