Tin resistensha kontra e klinika luhoso di adikshon di Jellinek na Kòrsou, asina De Volkskrant ta informá. E klínika ta haña 600.000 di euro di ministerio di asuntunan ekonómiko komo un empuhe finansiero pa Antia. Institutonan partikular di kuido di salubridat mental, ta haña ku e klínika ta kompetí inhustamente ku nan. Dje manera ei Jellinek por mantené su preisnan abou i atraé mas kliente privá, segun Bert Bakker, presidente dje asosiashon dje sektor. E ke pa e outoridat hulandes ku ta kontrolá kompetensha, hasi un investigashon. 'Si bo ke hasi algu pa Antia ta masha bon, pero e klínika akí ta intenshoná pa merkado hulandes', segun Bakker den De Volkskrant.

De Telegraaf ta dediká atenshon na e lei di polis pa Antia. Awe Tweede Kamer ta debatí riba esaki den presensia di parlamentarionan antiano i arubano. Remkes di VVD ke pa e tim speshal di reshèrshi, esta RST, keda na e islanan. Antia ta preferá un areglo konhunto. Remkes ta kontra. Un fasilidat komun manera Antia ke, lo no tin personal propio i outorisashon pa hasi investigashon. Lo e entregá un proposishon pa kambio dje lei ku lo konta ku un mayoria parlamentario konsiderabel.

Otro notisia den De Telegraaf. Un kampaña grandi kontra PvdA. E korant ta atvertí ku si PvdA ehekutá su programa di elekshon, e debe di estado lo subi te reim mei bion di euro den e 10 añanan benidero. De Telegraaf ta basa su mes riba kalkulashonnan di VVD i CDA. E partidonan ta yama e plannan di PvdA apsolutamente iresponsabel. PvdA ta haña e kalkulashonnan sumamente eksagerá.

Spits ta habri su edishon ku e titular 'Mas tantu biá ta mèldu loverboys'. E fundashon 'Stop Loverboys Nu' ta haña promedio 15 notifikashon pa dia. Esaki ta un duplikashon den komparashon ku aña pasá. Presidente dje fundashon Anita de Wit ta duna un splikashon dje oumentu. 'Nos fundashon ta fásilmente alkansabel. E víktimanan ta sinti nan sigur serka nos.' Pero falta basta kos pa hasi ainda, asina e presidente ta bisa. 'Hopi mucha muhé no ta tribi di hasi denunsia. E kastigunan no ta severo. E mucha hòmbernan ei ta kai prezu, pero djis despues nan ta kana rònt den libertat atrobe.'

Algemeen Dagblad a publiká un potrèt, kaminda por mira e futbolista surnameo Jermaine Lens di klup AZ ta hair ku smak. Antes e futbolista kier a bira abogado. 'Asta ora mi no tabatin rason, komo mucha mi por a konvense hende di mi rason', asina Lens ta bisa den Algemeen Dagblad. E tin un laso kaluroso ku Sürnam. Si e tim nashonal di Sürnam ta aki un par di aña mas mihó, mi no ta eskluí, ku lo mi skohe pa Sürnam. Su tio Sigi Lens tabata un djesnan ku a fayesé den e desaster ku e oroplanu di SLM na 1989.

Ministerio di Hustisia a intervení na un klínika sikiatriko penitensiario na Utrecht. E informe akí nos ta lesa den Algemeen Dagblad. Na e klínika tabata usa pashèntnan komo asistente dje trahadónan. Asina pashèntnan mester yuda tene otro pashènt den kaso di insidente, pashènt mester hiba otro pashènt sèl di isolashon i tambe yuda tene otro ora ta pasa angua. Filosofia dje klínika ta dirihí riba 'koperashon ku pashènt', pero e tratamentu a bira muchu físiko. Ministerio a duna òrdu pa entrante otro luna, terminá ku e método.

Het Financieele Dagblad ta informá ku e kompania TNT ke despedí dje parti di pòst. Ya ta hasi preparashon pa sea bende pòst hulandes òf yega na un fushon ku otro kompania òf asta bai bolsa. Segun Financieele Dagblad e desishon ta un paso mas aleu den e ya anunsiá strategia nobo. E kompania logístiko ke dirihí su mes mas riba transporte di pakete.