Titularnan di e matutinonan ta deskribí prinsipalmente e inkomprenshon kresiente pa prohibishon pa bula. AD porehèmpel tin un titular grandi riba su portada, kaminda direktor di KLM ta bisa, ku e ta haña e prohibishon pa bula riba Oropa gran ko'i loko. Segun Peter Hartman, direktor di KLM, espasio aéreo ta seif tur kaminda kaba.

Un di e tantísimo hendenan ku tin molèster di e prohibishon pa bula ta Arnon Grunberg, eskritor hulandes i kolumnista di de Volkskrant. Grunberg ta skibi den su kolumna kon un dams simpátiko di Delta Airlines a bis'é, ku pa e siman benidero tur buelo ta yen. Kisas e lo por bula bai Hulanda djasabra awor, asina ta para den de Volkskrant.

NRC Next tin un potrèt masha bunita di shelu blou riba su portada. No tin niun marka ni strepi di avion na laira. 'Pero e kos akí tabata realmente nesesario? asina e matutino ta puntra su mes. E korant ta skibi ku e bista di un shelu sin avion ta trankilisante, pero e matutino tin komprenshon tambe pa rabia di kompanianan di aviashon. Segun organisashonnan oropeo ku ta representá aviashon, e medidanan na Oropa ta muchu mas severo ku esnan ku ta tuma ora tin erupshon di volkan na otro parti di mundu. Asta ta asina ku NASA ta kalifiká e situashon komo ridíkulo, asina NRC Next ta skibi.

Masha hende tin molèster di krisis finansiero. Porehèmpel prizònnan tambe. E prezunan mester traha binti ora pa siman, pero ta difísil pa haña pedida pa trabou. Ora no tin trabou, e prezunan no tin mag di ta mas ora pafó di nan kamber. Segun Ton van Hulten, di servisio di institutonan hudisial, na Vught representante di prizònnan tin di sali bishitá empresanan ku no sa ku nan por akudí serka e servisio pa trabou. 'Nos tayernan por ta un solushon pa e empresanan ku ta ripará ku tin mas trabou ta drenta, pero no ta tribi ainda di tuma personal èkstra.' Het Nederlands Dagblad tin mas informashon di e tópiko akí.

Unu punto tres miar di euro a disparsé na kompania hulandes di trein, Nederlandse Spoorwegen. Esaki segun un investigashon di wèpsait di notisia yamá 'Nu.nl' i matutino Trouw. E kompania hulandes di trein no por bisa ta kiko el a hasi ku e plaka ku nan a haña pa drecha e stashònnan, ret di riel i trein i introdukshon di e karchi elektróniko pa biaha ku trein i transporte públiko e asina yamá OV chipkaart. Ta trata sèn ku Spoorwegen a haña dies aña pasá. Partido SP ke pa hiba un investigashon grandi pa wak kiko a hasi ku e sèn.

De Telegraaf ta skibi ku el a haña prueba importante den kaso di asesinato di Anneke van der Stap na aña 2005. Na febrüari a detené Ron P pa asesinato di van der Sap. Aktualmente Ron P ta será pa asesinato di Christel Ambrosius. De Telegraaf ta informá ku nan tin un USB stek di Ron P ku informashon komprometedó p'e. Segun e matutino e stek tabata di Anneke. Den kareda di awe de Telegraaf lo entregá e USB-stek na warda di polis.

Trouw tin un entrevista ku kolombiano i alabes hulandes yamá David Bohm. Durante 8 aña Bohm a biba na Kolombia, kaminda el a lucha tantu pa FARC komo pa ehérsito kolombiano. E tabata karga ilushon di bira un héroe manera Che Guevarra, pero a bolbe Hulanda desilushoná bèk. Bohm a skibi un buki titulá 'E fièrnu koló bèrdè di Kolombia, un hulandes i su lucha kontra FARC i kokaina.' Den e buki Bohm ta konta un banda di tur e horornan ku el a pasa aden, i di otro banda di apsurdes di su anhelo di ke bai guera bèk.