Rèpdó Kempi (24 aña) di origen antiano a siña di su eksperiensia den prizòn i awor e ta kla pa e 'next level'. Di 15 di novèmber te ku 13 di desèmber e rèpdó tin su mes programa di televishon'De deur uit met Kempi' tur djaweps na TMF. Den e seri e ta bishitá entre otro un rancho, un lugá kaminda nan ta bende eiskrim, un lugá ku ta bende soft drugs i un internat.

E idea p'e seri a surgi ora Kempi mes tabata será. Na tur el a yega di kai será shete biaha. Durante su estadia den prizòn e tabata gusta wak e programa di  Willy the opposites'. 'Mi tambe kier a hasi e kos ei.' Kempi ta splika: 'Mi mes a pone mi plan na otro pa mi purba sali di e kosnan ku mi tabata aden.' Ku e seri e ke mustra e televidente diferente aspekto di bida di hende. E ta spera tambe ku hende lo siña respetá otro su trabou. 'Tin biaha bo no ta respetá otro hende pasó e no tin e mesun trabou ku bo, b'a chèk?'

Sigui lucha
Den un entrega Kempi ta bishitá un internat. E ke 'mustra e muchanan chikí ku ta skucha mi müzik ku bida por kambia lihé.' E rèpdó ta konta ku 'tin biaha bo no ke tende di bo mama i di bo tata.' Esei por pone ku un hóben ta haña su mes den problema. 'Promé ku bo sa bo ta ta den un internat.' Anto bo no por kambia kurso di tempu, e ta komentá.

E kantante ta atmití ku el a krese, ku el a bira grandi. Otro aña e ta kumpli 25 aña, e tin tres yu i ta tempu 'pa mi stand up pa mi hendenan.' E tin konfiansa ku e lo keda riba e bon kaminda. Su mensahe pa hóbennan ta ku bo por logra tur kos. 'Si bo kere den Dios, si bo hasi bo bèst bo por hasi tur kos ku bo ke.' Basta un hende sigui lucha e por logra tur kos ku e ke, Kempi ta konvensí di esei.

Belkis Osepa a papia en ekstenso ku artista di rèp Kempi