Na 2008 muchu mas hende a risibí tratamentu ku remedi pa frena viro di HIV. Pero na Antia i Aruba nan no ta sufisientemente optenibel i e reseshon por ta influenshando e asuntu negativamente tambe.

World Health Organization (WHO), e organisashon di salubridat mundial a partisipá, ku na 2008 36 porshento mas pashènt a risibí medikamentu pa AIDS. Ta duna e remedinan anti-HIV pa evitá ku hende ta kontraé SIDA. E oumento akí no ta konta pa Antia ni pa Aruba, segun Melissa Diaz di Fondo pa Sida i Dòkternan di Mundu. Nan no ta haña remedi barata komo ku ta konsiderá nan parti di Hulanda. Ta pa e motibu akí nan no ta paisnan den desaroyo asina ta ku nan no ta bin na remarke pa tarifanan redusí di remedi.

"Mi ta sigur ku ta un bon notisia ku e kantidat di hende ku ta risibiendo remedi ta kresiendo. Pero ainda nos tin un trayektoria largu pa kana. Tin por lo ménos 5 mion di hende ku mester di tratamentu", segun Diaz. Plaka ta hunga un ròl grandi den e asuntu akí. Na Antia i Aruba e ta bastante kostoso ainda i no ta tur hende ta den e posishon pa paga, i ménos ainda esnan sin seguro médiko.
 

Sürnam
Diaz ta kere ku hopi pais, entre nan Sürnam, ta sufri di e efektonan di reseshon mundial ora ta trata di sèn pa paga remedi di bon kalidat. Loke ta pasa ta ku e paisnan akí ta na merset di organisashonnan di yudansa internashonal, ku no por saka tantu plaka asina.

E reseshon ta stroba akseso na remedi pa hopi hende. "Nos ta ripará tambe ku Hulanda ta gasta masha plaka na kombatimentu internashonal di HIV i di Sida, pero últimamente a redusí e suma ei drástikamente. Sürnam ta haña sèn di Global Fund pa duna hende akseso na tratamentu gratuito. "Si nan haña ménos plaka kasi sigur tin hende ku lo kai afó, sin por risibí tratamentu médiko."