Hulandesnan den eksterior ku ke vota dia 9 di yüni pa elekshon parlamentario mester registrá pa mas tardá dia 27 di aprel na munisipio di Den Haag. E formulario pa registrá ta disponibel riba wèpsait di Den Haag.

Si bo ta hulandes i bo ta bibá den eksterior bo por vota. Bo mester ta mayor di 18 aña sí i bo no mester ta ekskluí di por ehersé bo derecho di voto.

Hulandesnan den eksterior no-registrá
Pa bo por vota, bo mester registrá bo mes. Bo por hasi esei yenando e formulario di registrashon, prent e i mand'é ku pòst. Bo por apliká pa e formulario tambe na munisipio di Den Haag, un embahada hulandes òf un konsulado hulandes, òf serka representashonnan di Hulanda na Antia i Aruba.

Paga tinu: Bo mester inkluí prueba di siudadania hulandes den e formulario. Esaki por ta kopia di bo pasaporte òf kopia di bo tarheta di identidat hulandes. Fuera di esei bo mester indiká tambe si bo ke vota via karta, outorisashon (vòlmagt) òf via un hende na Hulanda ku ta bai un urna di bo eskoho.

Munisipio di Den Haag, konsulado hulandes, un embahada hulandes òf representashon di Hulanda na Antia i Aruba, mester a risibí e formulario pa mas tardá dia 27 di aprel. Riba e formulario bo tin di indiká tambe si bo ta vota via karta, òf ta outorisá un hende pa hasi esei, òf si bo mes ta vota na Hulanda. Bo por haña e adrès di Den Haag riba e formulario di registrashon.

Bo ta registrá kaba?
Si bo ta registrá kaba (ya ku bo a laga hasi esei pa elekshon di parlamento hulandes di 2006), bo ta haña outomátikamente e formulario pa registrá. Votadónan mester kontrolá e informashon ku tin imprimí riba e formulario akí, i si ta nesesario kambia nan. Despues di hasi e kambionan nesesario mester firma e formulario i mand'é akompañá di un prueba di siudadania hulandes.

Vota via karta
Másomenos tres siman promé ku dia di elekshon bo ta risibí e loke mester pa bo vota (prueba di voto via karta, papel di vota, un ènvelòp di retorno)  esaki a base di informashon di Ofisina Elektoral di munisipio di Den Haag. Yena e papelnan akí i manda nan bèk. Paga tinu pa pone bastante stampia riba e karta, sino bo voto no ta konta! Munisipio di Den Haag mester a risibí bo karta pa mas tardá 15or dia 9 di yüni. Bo ta kere ku esei no ta bai logra? Outorisá un hende antó.

Paga tinu: komo ku listanan di kandidato por bira definitivo te den lat, lo no por manda e loke bo mester pa vota promé ku másomenos 21 di mei. Esaki ta pasó te ku 43 dia promé ku elekshon partidonan por pone nan mes elegibel, asina lei di elekshon ta stipulá. Ta entrante e fecha ei numa (27 di aprel) lo por kuminsá porehèmpel ku produkshon di papel di vota.

Vota na Hulanda
Si bo ta na Hulanda dia 9 di yüni, bo mes por bai vota den un lokal di vota. E ora ei bo ta haña bo pas pa bai vota dos siman promé ku elekshon. Ku e pas akí bo por bai vota rònt Hulanda.

Vota via vòlmagt
Bo ta kere ku bo no ta logra di vota via karta? E ora ei bo por outorisá un hende na Hulanda (vòlmagt). E votadó ei ta haña e prueba di vòlmagt na su kas i ku esei e por bai vota pa bo. Paga tinu ku e persona akí ta pèrmití di vota pa no mas ku dos hende (inkluyendo su mes voto).

Hulandesnan na Antia i Aruba
Durante elekshon pa parlamento oropeo tur residente di Hulanda, Antia i Aruba tabatin derecho di voto. Esaki no ta e kaso pa elekshon parlamentario di Hulanda.

Hulandes ku ta biba na Antia i Aruba tin derechi di vota pa parlamento di Hulanda solamente si nan a biba por lo ménos dies aña na e pais, òf si nan ta den servisio públiko di Hulanda. E pareha di e delaster grupo di votadó aki, esta pareha ku ta biba huntu ku e votadó i e yunan tambe tin derecho di voto.

Bo no ta na Hulanda dia di elekshon?
Bo ta inskribí na un munisipio hulandes pero dia 9 di yüni bo ta den eksterior. E ora ei bo por vota via karta for di eksterior. Bo tin e alternativa tambe pa outorisá un hende na Hulanda pa e vota pa bo.

Pa bo por vota via karta den eksterior bo mes mester entregá un petishon por eskrito na bo munisipio. Tin formulario pa esaki, bo por haña nan na munisipio. Por entregá e petishon te ku i dia 12 di mei 2010. Riba e formulario bo mester pone e adrès den eksterior kaminda mester manda e loke bo mester pa vota.

Wak pa mas informashon riba sait www.kiesraad.nl i https://www.uheefthetvoorhetzeggen.nl