E próksimo referèndem na Boneiru ta trese tenshon den seno di koalishon ku UPB. E plebisito di mañan djabièrnè tabata kondishon primordial pa diputado Anthony Nicolaas pa un koalishon ku partido di Ramonsito Booi. Pero awor ku UPB ta hasi un yamamentu na públiko pa no bai vota, Nicolaas ta duda di supsistensha di e koperashon en kuestion.

Nicolaas no ke duna muchu komentario ainda riba e asuntu, komo ku e ke warda promé riba resultado di e referèndem. Un kos sí: e no tin masha komprenshon pa aktitut di UPB. No mester lubidá ku tempu ku a hasi e palabrashonnan ku Hulanda, ta e partido ei tabata na mando. E mes palabrashonnan akí ta tema prinsipal di e referèndem enkuanto statùs nobo di Boneiru komo entidat públiko di Hulanda.

UPB ta supos di fomentá un  'Sí'. E ponensia ku bonerianonan por duna sea un Sí òf un Nò ta lo siguiente: “Mi ta di akuerdo ku Boneiru ta bira un entidat públiko manera e ta figurá den artíkulo 134 di Konstitushon hulandes”.

Sifra di asistensha ta dudoso
Pa un desishon válido, 51 porshento di e kasi 9700 bonerianonan ku derechi di voto mester asistí. E pregunta ta si lo alkansá e porsentahe aki, pasobra aparte di UPB, PHU (Pro Hustisia & Union) di abogado Michiel Bijkerk tambe a hasi un yamamentu na e bonerianonan pa lébumai baimentu di urna. PDB di Jopie Abraham - i di su susesor komo lider di partido, esta Robby Beukenboom - ta konsehá pa vota 'Nò'.

Nicolaas ta para ariba pa e hendenan hasi uso  di nan derecho di voto pa indiká si nan ta pro òf kontra e interpretashon ku e ‘laso direkto’ di e referèndem di 2004 a risibí finalmente. Personalmente lo e vota kontra, ya ku despues di 10-10-10 e statùs aktual supuestamente lo trese mas desigualdat den Reino hulandes. Si e resultá un 'Sí' antó e ora ei lo e resigná. Sinembargo, pa Nicolaas e resultado ta ménos importante ku e écho ku pueblo por duna su preferensha.

Bòikòt
Ku su apelashon na elektorado, bon mirá UPB ta boikotiá e referèndem ku e ta balorá asina tantu. Asin´akí ta bula pipa pa e palabrashon ku ta fundeshi di e koalishon, segun Nicolaas. E ke sa tambe ku ya kaba UPB ta yama e referèndum e 'beibi di Nicolaas' i ku ta tratando na warda kurpa pa un eventual frakaso.

Si no logra alkansá e 51 porshento i no por deklará e resultado komo válido, e ora ei por pone UPB komo ko-responsabel. Nicolaas ta puntra su mes kon lo mester ehekutá reglamentu di referèndem huntu ku UPB, si pueblo di Boneiru bisa 'Sí'.

Referèndem nobo
E ora ei e koalishon mester proponé un referèndem nobo denter di seis luna, kaminda ku lo ofresé pueblo otro opshonnan di outodeterminashon tambe. Of lo tin di bolbe negoshá ku Hulanda riba interpretashon di e laso direkto.

Riba e pregunta si lo e desbaratá e koalishon ku UPB, Nicolaas no ke kontestá mésora ainda. Pero sí e ta bisa: “Klaro ku kos no ta bon, tenshon ta reina pero laga nos warda wak ki ta sosodé djabièrnè.”

Skucha diputado Anthony Nicolaas-Leila Wijnhoven a entrevist'é