E referèndem tokante futuro estatal di Boneiru, ku ta planiá pa tuma lugá dia 26 di mart próksimo, no ta sigur mas. Gezaghèber di Boneiru a pidi gobernador di Antia pa revoká e proyekto di lei enkuanto e referèndem. 

 
Gezaghèber Glenn Thodé di Boneiru ta bisa ku e plebisito ta pugna ku derecho internashonal. Ta resultá porehèmpel ku Hulandesnan no tin mag di vota si nan a bai biba Boneiru despues di promé di yanüari 2007. Fuera di esei tin masha desakuerdo riba e referèndem den Konseho Insular, siendo ku Nashonnan Uní a konsehá Boneiru pa dal bai kune únikamente den kaso di un konsenso. 
 
Ta algu sumamente eksepshonal ku un gezaghèber ta pidi gobernador di Antia pa anulá un proyekto di lei. Gobernador Frits Goedgedrag tin 30 dia di tempu pa disidí si e ta aseptá petishon di gezaghèber di Boneiru.
 
Eric Molina, un penshonado boneriano ku ta siguí e akontesimentunan na su isla natal ku hopi interes, ta kere ku mió e referèndum na Boneiru no tuma lugá mas. 

Molina ta haña ku lo ta bon pa renegoshá, pasobra Boneiru i Hulanda kada un ta pensa diferente di e manera ku e laso direkto mester bira entre e isla i Hulanda.