Konseho Insular di Boneiru ta debatí djabièrnè 29 di yanüari tokante e referèndem di 26 di mart. E ora ei pueblo por skohe pa un asosiashon ku Hulanda òf pa integrashon ku e pais. Gobièrnu i oposishon no ta di akuerdo tokante formulashon di e pregunta pa referèndem, ni si e konsulta ku pueblo tin sentido.

Jopie Abraham, líder polítiko di PDB , ta na fabor di un asosiashon. Di e forma ei Bonaire ta keda mas outónomo ora ta trata legislashon i e proseso di tuma desishon. ‘Den e kaso di integrashon ta Den Haag ta hasi esei. Teritorio Insular ta limitá den e loke e ta outorisá pa hasi. Den Haag ta disidí ta ki ta bon i malu pa nos’.
 

Negoshá di nobo
Lider di oposishon Ramonsito Booi di UPB, ku a negoshá e opshon di entidat públiko ku Hulanda, ta haña e modelo di asosiashon ko’i kèns. ‘Nan ta papia di un posishon kaminda Boneiru lo ta pará riba su mes den Reino. Mi no sa ta kiko esei ta nifiká. Komo ku e no ta un forma eksistente, mester bolbe bai negoshá tokante su kontenido’, asina Booi ta bisa. ‘Esei ta tuma su tempu atrobe i e ora ei bo tin di bolbe bai bèk serka pueblo’.
 

E ta teme pèrdèmentu di tempu pues, siendo ku segun e, outonomia ta posibel denter di e palabrashonan ku tin awor . ‘Loke nan ta trese dilanti awor ta kompletamente kos di loko’. Ademas na opinion di Booi, ora tene e referèndem lo diskriminá e hulandesnan oropeo, ekskluyendo esnan ku no ta inskribí na Boneiru promé ku 2007. ‘Nan tin mag di vota pa Staten sí, pero no pa referèndem. Ta akusá Hulanda di diskriminashon di alóktono, pero e kos akí ta pió’.
 

Asosiashon di 1993
`Segun Abraham e leinan ku parlamento hulandes ta trata awor, ta ilustrá ku integrashon no ta bon pa Boneiru. ‘Nan ta kere ku por bai kobra turista mas impuesto. Pero di e forma ei nos ta saka nos mes di merkado’. Abraham ta bisa ku e idea di asosiashon no ta nobo i ta parse e laso ku Aruba i Antia tin ku Hulanda awor. ‘Un propio areglo estatal i un legislashon propio. Pero ku limitashon ku no ta konta pa Aruba i Kòrsou komo pais outónomo.’ Na su opinion ta un modelo ku un promé minister Lubbers di e ten ei i minister Hirsch Ballin a proponé na 1993 kaba.
 

Douwe Boersema, outoridat riba tereno di derecho polítiko lo bira meskos ku den e kaso di Kòrsou anteriormente, presidente di komishon di referèndem na Boneiru. E komishon ei tin entre otro e enkargo di informá pueblo tokante referèndem.