Redakshon di Wereldomroep ta ofresé bo e korant di elekshon aki komo nos último kontribushon periodístiko di notisia na Kòrsou i komo kontribushon final na e debate polítiko.

Manera boso sa Wereldomroep ta tuma despedida di su lesadó i oyente na Kòrsou. Riba e páginanan aki bo ta haña un serie di artíkulo segun e tradishon di reportahe ku semper nos a honra den e añanan ku nos tabata aktivo na Kòrsou. Pa e korant aki, meskos ku pa e relatonan riba nos website òf pa e transmishonnan di radio, nos a drenta bario. 

Nos a skucha e hendenan ku tur dia ta haña nan ku e konsekuenshanan di polítika ku ta toka nan bida diario, òf nan pòtmòni. Nos a bai kombersá den e ‘baluartenan’ di e ocho partidonan ku ta partisipá na elekshon binidero tokante e loke e hendenan ku ta biba i traha einan ta haña di e situashon aktual i di e partido ku den nan bario ta, òf tabata, esun di mas fuerte.

Ademas nos a interogá e kandidatonan ku riba 19 di òktober ta buska pa e votadó skohe nan, tokante sinku tema ku aktualmente ta hunga un ròl grandi den nos komunidat: salubridat i partikularmente konstrukshon di e hòspital nobo, hustisia ku na promé lugá seguridat di e siudadano, finansa i e indikashon di Hulanda, edukashon i partikularmente e asuntu di enseñansa grátis i kuido di hubentut.

Nos a resumí tur esaki den un skema transparente i ku e korant aki nos ta spera di por yuda bo skohe bo voto riba 19 di òktober. Danki pa tur e atenshon ku nos a risibí di bo tur e añanan i pa aworó nos ta deseá bo hopi sabiduria na e momento di vota.

Ayó, Redakshon Karibense di Wereldomroep RNW

Download e korant di elekshon aki: http://sites.rnw.nl/doc/concept_verkiezingskrant_pap.pdf