Ta na gobièrnu pa haña e finansamentu di 108 mion florin pa un hòspital nobo. Si esaki keda kla aki kuater luna por kuminsá konstrukshon.

Awor ta di mira si gobièrnu por logra di regla e finansamentu despues di e indikashon di Konseho di Minister di Reino. Pasobra e indikashon aki ta prohibí gobièrnu di tuma obligashon finansiero nobo por lo pronto.

Koperashon
Ballast Nedam por konstruí e hòspital nobo huntu ku ofisina di arkitekto OeverzaaijerLyongo. Pa Sona, ku ta guia e konstrukshon di e hòspital nobo, tabata importante ku lo a traha ku partner lokal.

Banda di Ballast Nedam i OeverzaaijerLyongo tambe tin ingeniero di e kompania Cauberg Huygen, instaladó di Valstar Simonis i arkitekto di EGM den e konsorsio. EGM ta envolví den konstrukshon di diferente hòspital na Hulanda.

Edifisio bèrdè
E planifikashon nobo di e península remarkabelmente parse e plannan ku e ofisina di arkitekto OeverzaaijerLyongo tabatin pa e edifisio nobo di Aqualectra ku na promé instansha lo a konstrui riba e tereno bieu di Amstel. Ta pèrkurá pa hasi e edifisio mas ‘bèrdè’ posibel. Ta bini terasa riba dak i bientu mester tene e edifisio fresku.

Kasi dos aña pasa henter e besindario di e tereno di Amstel a yena ku awa ora e depreshon tropikal Thomas a pasa riba Kòrsou. Lo subi e tereno di e hòspital nobo ku un meter, asina ku nunka e hòspital nobo lo no yena ku awa, segun Sona. Nan no por a garantisá nada si pa loke ta e besindario.

Oferta
For di september Sona ta kordiná konstrukshon di un hòspital nobo. Na promé instansha 14 kompania a hasi un oferta pa konstruí e hòspital. Mirando entre otro konfiabilidat di e kompanianan i manteniendo e eksigenshanan di konstrukshon na un nivel haltu, a sobra tres oferta.

Na final Balast Nedam a gana. Banda di e echo ku nan a envolví partner lokal nan tabata mihó den garantia di un plan di mantenshon di 15 aña. Si ta na Sona por entregá e hòspital na kuminsamentu di 2014. Awor ta na minister Scoop-Constancia di regla e finansamentu.