Ministerio Públiko no ta pèrsiguí e polítikonan boneriano Ramonsito Booi i Burney El Hage mas. Ministerio Públiko a bisa nan abogadonan ku a seponé e kaso kontra nan relashoná ku labamentu di plaka i narkotráfiko.

Booi ta lider di e partido di gobernashon UPB i ta akualmente miembro di konseho insular na Boneiru. El Hage tabata èks minister pa e partido. Na sèptèmber 2009 a listra nan kas den kuadro di e investigashon grandi relashoná ku labamentu di plaka i narkotráfiko internashonal. Nunka no a arestá e polítikonan akí.

Ora ku ministerio públiko no a dagfar nan fin di aña pasá nan abogado a eksihí pa stòp ku e investigashon. Komienso di e aña akí ministerio públiko a pidi wes komisario pa nan por sigui ku e investigashon, pero a rechasá e petishon.

Misterio
Ramonsito Booi ta bisa ku henter su bida a kambia awor ku 18 luna despues a seponé e kaso. "Ta keda un misterio pa nos kon Ministerio Públiko a atendé 18 luna largu un dokumentu polítiko di oponentenan polítiko di mi, sin duna nos un chèns pa nos defendé nos mes. Nos no tabata sa mes, tokante kiko e ta bai."

Awor ku a seponé e kaso no ta nifiká ku tur kos ta tras di lomba, asina Booi ta bisa emoshoná. "Sí a seponé e kaso, pero pa semper bo nòmber ta dañá, mientras mi sentimentu ta bisami ku e kos aki no mester a pasa."e kaso aki a kondusí na hopi konmoshon na Boneiru, kaminda ta tene dia 2 di mart elekshon den kua UPB ta spera haña un mayoria apsoluto ku e mensahe ku nan ke trese stabilidat den polítika.