Rèktòr di Vespucci College na Julianadorp, Theo Fransman, no ta kontentu ku manera di aktua di Isla ni di gobièrnu, despues di e insidente di puiru di siman pasá: “Mi mester a tuma un desishon riba seguridat di mi alumnonan , antó unda gobièrnu ku Isla a keda!”

Djárason 1 di yüni un kantidat te ainda deskonosí di un supstansia katalisador a skapa for di refineria, tapando partinan grandi di Julianadorp bou di un dekel blanku di stòf..

Fransman ta haña aktitut di esun ku a okashoná e problema i di gobièrnu, na su pareser, inkomprendibel: “1100 mucha aki na Julianadorp ta bishitá diferente skol!’

Asosiashon di bario
Asosiashon di bario Fundashon Julianadorp tampoko no ta kontentu ku manera di aktua di gerensia di Isla i di minister di Salubridat Públiko, Jacintha Constancia, i nan a skirbi un karta na tur dos partido.

Pa e asosiashon di bario ta inkomprendibel kon tantu refineria Isla ku Servisio Medio Ambiente no tabata alkansabel telefónikamente e mainta ei. Tampoko no por komprondé ku gerensia di Isla no a pone minister Constancia na altura, momentu ku e insidente a tuma lugá.

E asosiashon di bario ta di opinion, meskos ku rèktòr di Vespucci College, ku ta imposibel ku e refineria i Servisio Medio Ambiente ta kleim ku e situashon no tabata peligroso, sin ku a investigá esei.

Karta
E asosiashon di bario a pone su malkontentu riba papel i a yama gerensia di Isla i minister di Salubridat Públiko pa responsabilisá nan mes. Segun e asosiashon ta tarea di gobièrnu pa protehá pueblo p’e no inhalá supstansianan venenoso ni drenta den kontakto ku suptansianan peligroso.

Fundashon Julianadorp ta bisa ku e no ta komprondé ku no ta sankshoná e refineria ku netamente ta okashoná e daño akí i ku e planta por sigui ku su aktividatnan ílegal.

• Karta di Fundashon na minister Constancia (31kb, pdf)
  
• Karta di Fundashon na gerensia di PdVSA (30 kb, pdf)