No opstante e situashon finansiero prekario di Kòrsou, partido di koalishon Pueblo Soberano (PS) ke kumpli ku promesa ku a hasi pueblo di Kòrsou. Parlamentario di PS Jaime Cordoba: “Nos no por primintí pueblo algu anto keda sin kumpli.”

Cordoba ta rekonosé ku ‘tur kos a pega’, ku e mensahe di Cft. Siman pasá e kolegio a manda gobièrnu di Kòrsou ‘drecha nan asuntunan purá’ i raportá den dos siman ki medida ta bai tuma pa baha e defisit den presupuesto di e aña aki.

Kiebro
E preshon di Cft i e oumento di tenshon entre e partnernan di koalishon PS i MFK ta trese spekulashon di un posibel kiebro. Parlamentarionan di tur dos partido ta pleita pa dianan largu kaba den Staten.

Cordoba no ke papia di un posibel kiebro. “E diskushon ta trata di efisiensia na trabou.” Lider di frakshon di PS, Helmin Wiels, tampoko no ke papia di un posibel kiebro. Wiels: “Ta un diskushon tokante staatsregeling, trias polítika, demokrasia i outoridat di parlamento. MFK mester tene un dia di estudio tokante e komprondementunan aki pa siña base. P’e band’ei miembronan di MFK tin un retraso grandi ku nan tin ku alkansá.

Instrukshon
Djarason 13 di yüni durante konseho di minister probablemente lo papia di medida ku mester tuma ainda i reformashon ku mester drenta na vigor e aña aki mes. Por ta ku sierto promesa ku ta bai kosta hopi plaka lo kita for di mesa.

Segun Cordoba e ministernan di PS a haña instrukshon kla pa realisá nan ‘mes’ promesanan. “No por t’asina ku hòspital nobo sí ta bini i enseñansa gratis nò.” PS ke pa e regla di 80/20 (trabou pa yu di Kòrsou promé), penshun di mil florin i seguro general bini.