Habitantenan di Saba a probechá di e bishita di e lidernan di frakshon di Tweede Kamer pa manifestá kontra deterioro di kondishon di bida riba e isla. Ora e lidernan di frakshon a yega riba e isla djasabra, tabatin mas o ménos kuarenta manifestante ta spera nan.

Tabata un protesta ketu pero kla di parti di e sabanonan. E manifestantenan tabata bistí na pretu ku blanku i tabatin bòrchi ku teksto manera: ‘10-10-10, te ainda nos no a mira nada positivo’ (na hulandes) i ‘Holland shows no mercy’.

Segundo kategoria
Habitantenan di Saba ta sinti ku for di dia ku nan a bira munisipio spesial di Hulanda aña pasá na òktober, nan a bira hulandes di segundo kategoria. Segun e demostrantenan, for di e fecha ei salubridat, enseñansa i nivel di bida a bai atras.

E manifestashon na aeropuerto di Saba tabata esun promé den historia di e isla. Na aeropuerto e lidernan di frakshon a laga e manifestantenan informá nan ampliamente. Djasabra mèrdia e lidernan di frakshon hulandes lo hiba kòmbersashon ku habitantenan lokal. Esakinan a laga sa kaba ku nan lo bini ku hopi mas tantu hende.

Stolte
Representante di Reino, Wilbert Stolte tambe tabata na Saba pa duna e lidernan di frakshon bon biní. Pero pa sorpresa di tantu e sabanonan komo e polítikonan ulandes, e funshonario a disparsé atrobe djis un ratu despues. Mayoria lider di frakshon parlamentario ulandes a mustra komprenshon pa e malkontentu ku ta reina na Saba. Nan ta boga pa fortifiká e ròl di minister Donner di Relashonnan di Reino komo kordinador di Islanan BES.

Vários sabano ta dominá idioma papiamentu, aparte di ingles i hulandes. Nos a papia ku Dave i Ishmael Levenstone, ambos bibá na Saba. Den kòmbersashon a sali ku hopi dje problemanan na Saba a surgi, komo ku for di 10-10-10 a implementá hopi regla den un aña di tempu, siendo ku un periodo di transishon lo tabata muchu mas adekuado pa e habitantenan kustumbrá i aseptá tur e kambionan.

Salubridat
Dave Levenstone ta di opinion ku e problema di mas grandi ta salubridat públiko: "Un pashènt ku mester bai Guadeloupe òf Colombia pa kuido médiko, no ta dominá ni franses ni spañó...bo ta bai speshalista, anto un hende djafó lo tin di drenta kamber pa tradusí..." Dave Levenstone ta haña ku e kos akí ta stroba privasidat i konfiansa médiko.

Fuera di esei Levenstone a ripará ku kosto di bida a subi enormemente, 'un saté ku batata ta kosta nuebe dòler, kaminda ku antes e tabata dies florin', pues kasi dòbel mas karu. Levenstone no ta kulpa e hulandesnan so dje situashon, sino 'nos mes hendenan' (polítikonan) tambe, ku na su pareser 'ta biaha bai Hulanda pa reunion, sin sa kiko tin pará riba papel, basta nan fiesta, bebe shampaña...trit.. k'eseinan.' Dave Levenstone ta konvensí ku e promé protesta den istoria di Saba lo no bira e último, 'pasó e situashon ta fòrsa tur hende pa aktua.'

Kosto di bida
Ishmael Levenstone, lider di oposishon di Saba a papia ku e delegashon parlamentario di bishita na e isla, pa splika nan e situashon eksistente. Den pasado Hulanda a primintí un skat di kos riba nivel ulandes, manera penshun i sistema di kuido médiko pa islanan BES, pero esaki no a bira realidat. Levenstone a kana mustra e miembronan di frakshon ulandes kon kos sa bai, por ehèmpel na botika, kaminda mester paga pa remedi. "Preisnan ta mata nos, tin hopi hende pober na Saba..." Levenstone ta splika ku sabanonan no tin nada kontra laso direkto ku Hulanda, sino mas bien ku e forma ku a implement'é.

E lider opositorio tin e impreshon sí ku e delegashon a komprondé e situashon. Ishmael Levenstone ta kere ku awor ta di warda riba e momento ku ta komprondé otro i pa wak ki opshon a keda, pa sa kiko ta bai hasi.