Bonerianonan malkontentu tin plan pa manifestá esaki durante e bishita real di djaluna, 31 di òktober. E habitantenan no ke tende nada di e statùs nobo di nan isla. Hopi hende a bai atras finansieramente for di dia ku Boneiru a bira munisipio ekstraordinario di Hulanda; preisnan a subi i nan tin miedu di pèrde nan identidat.

Cedric Soleana ta bosero di un grupo di boneriano malkontentu. E ta reakshoná emoshoná durante bishita di lidernan di frakshon di parlamento hulandes. Soleana ta bisa: "Mí ta gradisí Dios, ku tur medio di komunikashon ta pèrkurá pa tur loke nos bisa keda publiká. Nos ke pa ora Lareina bishitá nos isla, no hib'é bai mira kayanan nèchi asfaltá í edifisionan ku a keda konstrui ku plaka di Hulanda, pa tapa e realidat.”

Soleana ta haña importante pa Lareina Beatrix skucha pueblo."Promé ku el a bira reina, e ta hende. Manera ku e ke pa trat'é, esei nos tambe ké. E mester mustra nos su kurason materno. Un mama no ta bandoná su yu i lag'é murí di hamber i pobresa."