Djárason mainta 6 or Misa di Heilig Hartkerk den Schilderswijk na Den Haag tabata hopi bon bishitá. Aya a tene e promé Misa di Ourora di e aña aki. Pastor Bouman di Órden di Dominikanonan, lider spiritual na Antia Ulandes i Aruba den e último 47 aña, a guia e promé santu sakrifisio di misa di ourora.
 

Hopi tabata esnan ku a probechá di e oportunidat pa topa ku promé minister di Antia Ulandes, Emily de Jongh-Elhage, minister di hustisia Magali Jacoba i minister plenipotensiario di Antia na Ulanda, Marcel van der Plank.
 

E servisio a haña un toke speshal ku partisipashon aktivo di koro Heavens Touch. E promé minister a tuma tempu spesial pa gradisí e integrantenan pa nan kompañamentu musikal.
 

Desiree Martina, organisadó di e serie di misa di ourora, a apresiá bishita di promé minister, minister di hustisia i di minister plenipotensiario mashá. “Boso ta semper bonbiní serka nos den Schilderswijk”, asina Martina a bisa.