“Na final di 2010 a sana e debe si, pero esei no tabata ke men ku nos a kuminsá Pais Kòrsou sin debe.” Esaki promé minister Gerrit Schotte a bisa awe. “No a kita e kousanan di e problema di debe, ainda tabatin un buraku ta lèk.” Aworaki si esaki no ta e kaso mas.

Promé minister ta bisa “tin un plomero ta traha pa sera e buraku”. Segun e ta traha pa baha gastunan di gobièrnu, espesialmente riba tereno di salubridat públiko. Einan tin 7 pa 8 mion pa luna ta lèk bai. Esaki nos ke para pa medio di introdusí reformashon riba diferente tereno. E prome minister a bisa entre otro ku e dos diferente seguronan médiko ku e isla konose mester bai huntu bira un, ku preis di remedi mester baha i ku mester investigá honorarionan di speshalista.

Situashon ta serio
College financieel toezicht (Cft) djasabra a bati alarm ora ku nan a yama estado bùdjètario di Kòrsou ‘serio’. Urgentemente mester a haña 85 mion florin pa sera e buraku den e presupuesto aktual. E défisit di aña pasá komo eksepshon Cft a pèrmití di pag’é for di reservanan.

Promé minister no a ninga awe ku e situashon finansiero di e pais ta serio. Pero el a enfatisá sí ku no tin kestion di un krísis. “Lo paga salarionan di amtenar i plaka di vakashon normalmente na tempu i lo kumpli ku tur obligashon koriente”, promé minister a bisa.

Ademas e ker a aklará ku e reformashonnan tan desea pa Cft den kuido médiko i penshun ta na kaminda, i ta suma 60 mion. Pa esaki mester di legislashon ku no por desaroyá un dos tres. “Nos no ke haña nos ta adaptá òf revisá tur kos atrobe aki un par di aña”, segun Schotte.

Entrada ta na kaminda
Na banda di entrada tambe tabatin bon notisia segun Schotte. E protokòlnan di gobernashon durabel a kuminsá bira bentahoso. Algun NV di gobièrnu porfin a paga nan debe na gobièrnu loke a pone ku e 25 mion di entrada ku Cft ke mira den sifra, tabata riba mesa kaba.