Promé minister di Kòrsou Gerrit Schotte ta ninga di baha for di su posishon na fabor di un gabinete interino. Esaki el a laga sa djamars 25 di sèptèmber den un karta na gobernador Frits Goedgedrag.

Den su karta Schotte ta ekspresá kon el a keda asombrá ku e desishon di gobernador pa tòg bai di akuerdo ku e petishon di diesdos miembro di oposishon pa nombrá un gabinete interino. Segun Schotte e desishon aki di gobernador ta ‘insufisientemente motivá i gobernador niun ora no ta outorisá pa tuma un desishon asina’.

Den su karta Schote ta enfatisá ku segun regla i norma di Lei di Estado parlamento no por manda un gabinete demishonario kas a base di deskonfiansa di índole di polítika partidista. “E problema ta seka e diesdos miembronan di oposishon ku ta ninga di kumpli ku nan huramento di kargo i nan responsabilidat di trata asuntu koriente ku e gabinete demishonario.”

Segun Schotte gobernador no solamente ta operá fuera di su kompetensha, sino el a asta tuma posishon polítiko, algu ku segun e promé minister no ta pas den su ròl komo gobernador. Schotte ta bisa den su karta na gobernador: “Mi ta di opinion ku gobernador ta tuma posishon den e kontroversia polítiko eksistente den nos pais, mientras ku ta gobernador su deber konstitushonal pa den e sirkustanshanan polítiko aktual tambe mantené unidat di gobièrnu. Mi ta pidi gobernador urgentemente pa stòp de mete den formashon di un gabinete inerino.”

Gobernador no a reakshoná riba e karta aki ainda. Djabièrnè e ta reuní ku formadó Mendes de Gouveia pa palabra kontinuashon di formashon di un gabinete interino. Ayera kaba a anunsiá e promé nòmbernan di e ministernan interino ku e diesdos miembronan di oposishon a skohe.