Nelson Oduber, promé minister demisionario di Aruba lo no sinta den Staten nobo. E ta keda kabesante polítiko sí di MEP. E partido akí a pèrdè elekshon pa Staten dia 25 di sèptèmber último. Oduber ke traha espasio pa hóbennan den e partido. E ta hasi un apelashon na su kolega-ministernan pa sigui su ehèmpel.

Oduber ta kere ku a bira tempu pa pasa su konosementu i eksperensha pa otronan despues di un periodo di 34 aña di polítika aktivo. For djawó e ke kuminsá traha riba un lista nobo di kandidato pa e elekshon di aki kuater aña. E ta hasi un yamamentu na su kolega-ministernan pa hasi meskos: "Mi ta spera ku e demas personanan riba lista lo saka nan sòm despues di pèrdè elekshon.”

Rechaso
Oduber no ke menta nòmber di e ministernan, ku segun e mester traha lugá pa otro hende: “A rechasá e gobièrnu akí den su totalidat.” E ta di opinion ku MEP mester bin ku e adapatashonnan nesesario den partido despues di kambio di gobièrnu, moda ku no ta rekrutá hende nobo riba man, kédesir te djis promé ku tene elekshon atrobe.

Desapunto
Ora ku e resultado elektoral a drenta, Oduber a keda mashá desapuntá ku pèrdida di MEP, apesar ku el a mir'é ta bin. Ocho aña largu el a goberná ku un mayoria apsoluto. Bon mirá e no ta kere ta algu komun pa un demokrasia i un estado di derecho si el a keda diesdos aña na poder. E ta deskribí dimenshon di e pèrdida komo un 'gòlpi sólido'.

Opositor veterano

Oduber mes a sinta basta aña den oposishon. Ta p'esei e por suich di mandatario pa opositor sin ningun difikultat: “Mi ta kla pa start sali.” Komo prueba di esaki e ta baha riba futuro promé minister Mike Eman: “A bira tempu p'e bisa kiko e ta bai hasi. Ta ápnormal tòg ku e ta entregá un lista di minister promé ku bin ku un programa di gobièrnu.”
 

Skucha un reportahe di koresponsal Jos de Roo na Aruba