Si Hulanda i Saba bisa ku nan ke tuma e tareanan di Antia ulandes pa e isla, e  or'ei nan por bien haña nan awóraki mes. Asina promé minister antiano Emily de Jongh-Elhag a bisa. Saba ke bira parti di Hulanda pa kaba, pero e ta mira ku kos ta tarda ya ku tòg lo tene elekshon pa Staten antiano, siendo ku lo disolvé pais Antia, mió konosí komo 'Land'.

“Si Saba i Hulanda bisa: ‘awor nos ke e tareanan’, nos lo manda nan Saba awóraki mes”, asina e promé minister antiano di. E ta desapuntá wèl ku desishon di Saba, pero e por imaginá su mes e emoshonnan n'e isla si: “tur, ku eksepshon di Kòrsou, ke logra e státùs nobo mas pronto posibel,esaki ya pa años kaba. Pero esaki mester di tempu.”

Deseo di separashon
Roland Duncan, minister antiano di Asuntunan Interno i KOnstitushonal tin pleno komprenshon pa e echo ku Saba ke separá. Duncan, desendiente di Sint Maarten, ta haña ku Statia i Boneiru tambe mester hasi meskos. "Es mas, lo mi rekomendá nan e kos ei. Si hende ke bai, bo no mester fòrsa nan pa keda mas tempu serka bo.”
Duncan ta konvensí, meskos ku diputado Chris Johnson di Saba, ku Kòrsou no ke laga Antia bai mes. “Mi ta felisitá Saba ku su fihamentu di posishon”, asina Duncan di. “Gobièrnu antiano mester ehekutá desishonnan di pueblo. E pais mester fasilitá e islanan pa nan risibí nan státùs nobo.”

Emoshon ku asuntu di elekshon
Motibu di e paso di Saba ta e desishon pa sigui ku elekshon di Staten di yanüari 2010. E kos akí a lanta hopi emoshon serka vários polítiko antiano, tambe di partidon di koalishon. De Jongh-Elhage: “Tur hende sa ku e palabrashon tabata ku nos lo sigui konseho di Raad van Advies. Ora ku kos kalma atrobe nos lo papia ku e partidonan di koalishon.”

Duncan ta di opinion ku Raad van Advies ta muchu orientá riba Kòrsou so, un krítika ku e ta kompartí ku e polítiko sabano Will Johnson. Duncan: “Raad van Advies no a para ketu sufisientemente ku e derecho di outodeterminashon di e islanan i ta trata di konservá su mes posishon.” E ta haña ku enberdat elekshon ta wanta e proseso innesesariamente: “Nos por keda kla ku legislashon i kompetensia promé ku fin di aña asina ta ku mester stòp di maha. Laga nos kuminsá di biá.”