“Pa no diskriminá, sosiedatnan mester ta dispuesto pa tolerá asuntunan ku no ta agradabel.” Esaki ta un di e ekspreshonnan ku Arjen van Rijn a hasi djamars anochi durante su oratorio pa asumí e funshon di profèsor ekstraordinario den Konstitushon na Universidat Nashonal di Antia (UNA).

Van Rijn a huza e problemátika di matrimonio entre homoseksual pa supstansiá su ponensia. Na Hulanda kasamentu entre hende di e mesun sekso ta reglá pero den e partinan karibense di reino hulandes ta pensa hintéramente otro riba esaki. E islanan ku den pasado tabata forma Antia ta duna kontenido na nan mes òutonomía pero nan legislashon no tin mag di bai kontra di Derechonan Universal di Hende ku ta stipulá ku estado no tin mag di diskriminá.
“Tin biaha e kambionan ku e prohibishon di diskriminashon ta eksiguí no ta fásil, pero kada bes atrobe nos mester atravesá esei”, Van Rijn ta bisa.

Artíkulo 27
Aparte di ta ankrá den e konstitushon nashonal di e kuater paísnan di reino, e prohibishon di diskriminashon ta den tratadonan di derechi humano tambe. Ku desmantelashon di Antia hulandes a stipulá – elevá riba tur diskushon – ku e tratadonan akí ta konta pa e paísnan nobo Kòrsou i Sint Maarten tambe.
Artíkulo 27 di e Statüt nobo ta duna Hulanda moda pa intervení si Kòrsou òf Sint Maarten kai chikí den kumplimentu ku e tratadonan akí. Segun Van Rijn por mira esei komo tachamentu di e òutonomía pero e paísnan nobo mes ta envolví den ratifikashon di tratado i por skohe pa no firma. “Por sierto esei no ta dje fásil den kaso di derechi humano”, Van Rijn ta remarká.

Hóbennan di riesgu
E aula basta yen di UNA a risibí un splikashon tambe di e opheshonnan di prinsipio i e puntonan di atenshon relashoná ku e Índise di Referensha pa Antiano i e proyekto di lei nobo ku gobièrnu-Rutte ta bai presentá. “E proyekto di lei aktual ta dirigí riba tur hóben di riesgu sin importá nan etnisidat. Esei ta un diferensha esensial. Diskriminashon no ta rondia e asuntu mas, a menos si resultá ku ta hobennan di  islanan karibense so e areglo nobo ta mishi kuné”, Van Rijn a trese dilanti.
“E kuestion di hobennan di riesgu ta ilustrá kon delikado legislashon ta ora mester ataká problemanan sosial real  evitando di por wòrdu tildá di diskriminashon. E pregunta importante ta: kon igual nos ta reálmente komo siudadano den e mesun reino?”

Un konosí
Arjen van Rijn a aseptá su nombramentu na UNA pa un periodo di sinku aña. Aktuálmente e ta sosio i abogado na Pels Rijcken & Droogleever advocaten en notarissen na Den Haag. Van Rijn ta konosí na Kòrsou: despues di un karera den periodismo e tabata algun aña ligá ku UNA komo lektor.