Ta bon pa informá Antiano i Arubano na e islanan regularmente dje bida akí na Hulanda, segun Raymond Labad, presidente di MAAPP ku ta e organisashon pa promové partisipashon di Antiano i Arubano na Hulanda. El a bisa esaki na okashon di estreno dje programa 'Aki na Hulanda' di Radio Nederland Wereldomroep. Entrante awe, 26 di òktober, e emisora mundial di Hulanda ta ofresé e programa informativo akí kompletamente na Papiamentu tokante Antiano i Arubano na Hulanda.

Raymond Labad ta haña e programa un bon inisiativa ku lo aportá na informá pueblo antiano i arubano na e islanan. "Na Antia i Aruba nan falta hopi informashon ku ta duna un imágen kompletamente diferente. Gran parti dje informashon ku nan ta haña ta via amigunan i famia. Nan ta pinta Hulanda komo sifuera ta un paraiso. Na Antia i Aruba nan ta pensa 'mi tambe ta bai Hulanda i biba den paraiso'."

Tópikonan
Radio Nederland Wereldomroep lo por informá awor tokante diferente tópiko manera entre otro enseñansa, integrashon, salubridat i polítika. Labad ta añadí tambe ku ta bon tambe pa pueblo antiano i arubano haña informashon di hende eksitoso i ménos eksitoso for dje komunidat antiano i arubano akí na Hulanda. E ta menshoná por ehèmpel informashon di hendenan ku tin eksperenshanan ménos agradabel, manera èks-detenidonan ku a kai será pero ku a bin bèk den komunidat i logra algu.

MAAPP
E organisashon MAAPP ku ta promové partisipashon di Antiano Arubano na Hulanda tambe por duna un aporte pa informá pueblo na Antia i Aruba mihó, segun Labad. "Nos tin komo meta pa duna informashon i hasi hende mas konsiente dje desaroyonan polítiko na Antia i Aruba. Pa medio dje programa por informá esnan na Antia i Aruba dje desaroyonan polítiko."

Algu mashá importante ta segun Labad, ku Antianonan i Arubanonan sa di nan derecho, pero tambe di nan debernan. "Nan mester sa kiko mester hasi akí, kiko ta por ehèmpel posiblidatnan di enseñansa." Pesei Labad ta haña importante ku e emisora mundial ta tresé informashonnan na Papiamentu riba un nivel ku tur hende ta komprondé.

Labad: "Aparte ku e programa ta na Papiamentu, e oyentenan mester komprondé tambe kiko bo ta papiando. I pa e motibu ei mester tin un akohida grandi." Radio Nederland Wereldomroep mester divulgá i hasi e programa bon konosí serka su oyentenan aktual i futuro oyentenan na Antia i Aruba.

Pa skucha Raymond Labad den kòmbersashon ku Belkis Osepa klek riba e banner di Aki na Hulanda na man drechi di e página òf wak e artíkulo prinsipal djawe i klek riba 'djaluna' (koló blou).