Nos supermerkadonan ta reakshoná riba e oumento di pedida pa produkto salú. Nan ta bende awor mas produkto salú i biológiko ku nunka ántes. Pero e produktonan salú ei mas bien ta e klase medio i haltu ta kumpra nan.

Konsumidónan mas i mas ta bira konsiente di loke nan ta kome. Nan ta lesa ku mas frekuensia e etikèt di e produktonan. Tin ademas mas informashon disponibel tokante por ehèmpel fortalesedó di sabor den kuminda ku no ta salú. Tin un demanda pa produktonan biológiko i esnan liber di gluton.

Produktonan biológiko
“Nos tin sekshonnan spesial den supermerkado kaminda por haña produkto salú. Tambe benta di bèrdura i fruta biológiko ta subiendo”, asina Allan Evertsz, manager di Vreugenhill ta bisa. “En bèrdat, hende ta preokupá muchu mas pa su salú. Algun hende ta sigui un dieta spesífiko, pues nan ke kumpra sierto produkto.” Vreugdenhil ta importa produkto biológiko i produkto di dieta spesífiko for di Europa i Merka.

E produktonan salú tin nan tarheta di preis sólido tambe. Evertsz: “Produktonan biológiko realmente ta karu. Esei ta debí na e manera ku nan ta kultivá e produktonan akí. Nos sa ku ta difísil pa e konsumidó ku un entrada abou pa e kumpra e produktonan ei.”

Diariamente ún
Mariselle Martis ta kumpra ku regularidat pa n i ko’i kome ku pan pa anochi na minimarket  Agusolna Groot Kwartier. Kompranan grandi sí e ta hasi na supermerkadonan mas grandi. E ta konfirmá ku tin hopi hende ku diariamente ta kumpra ún promentòn, ún siboyo i ún tomati na e toko.

E por splika tambe eksaktamente di kon. “Nan tin otro kos na nan kabes. Nan no ta pensando kiko ta salú i kiko nò. Bo mester mira e ambiente sosial di e hendenan akí. Hopi bes nan ta haña nan plaka kada kinsena i nan tin pa dia solamente un suma chikitu pa nan gasta.” 

Martis ta un enfermera privá i ta traha tambe den seguridat. “Mi ta bai kas serka hende. Tin bes nan no tin frishidèr òf un masha chikitu, i den esei hopi kos no ta bai. Otronan ta biba serka otro hende i ta solamente loke nan tin mester e dia ei nan ta kumpra. Den tur kaso kos ta resultá nan mas karu.

Poko kunukero
Albert Heijn tambe ta reakshoná riba e demanda kresiente pa produkto slaú biológiko. Manager Rens Mulder di Albert Heijn ta di opinion ku na midí ku demanda subi e preis lo bai baha. “E problema ta ku tin demasiado poko kunukero ku por suministrá e sufisiente kantidat di bèrdura i fruta biológiko.”

Mulder ta mira un posibilidat pa e hòmber chikitu pa kumpra produkto salú. Nan mester kambia nan kondukta di kumpra i di kome. “Mi ta preferá un bòter chikitu di ápelmus biológiko, ku un bòter grandi di ápelmus yen di suku i aditivo. Aki na Kòrsou nos gusta kome for di tayó grandi ku ta yen. Pero si bo tuma e plaser ku algu ménos, pero di bon kalidat bo ta pa loke ta trata e preis, téknikamente esei ta salibo mesun karu.

Toko
Na kuminsamentu di anochi hopi hende ta drenta i sali Toko Portugal den Dein. Un señora bon bistí ta pará na kaha ku un pan, un man yen di lamunchi i un bòter di bèrdura. “Mi ta kumpra tur dia toko pasobra ta esei mi ke. Mi sa bai supermerkado sí de bes en kuando, pero mi sa tambe ku ora mi hasi esei mi ta gasta muchu mas tantu plaka na kosnan sin tin nodi. Mi ta usa mas gasolin tambe, pasobra mi mester kora bai mas leu. Toko ta djis na skina ei.”