Na Brionplein tabatin sigur mas ku 500 haitiano ta warda presidente Martelly oranan largu, pero ora porfin el a yega, tabatin un fiesta grandi.

E avion ku na bordo presidente di Haiti i ministernan di Asuntunan Eksterior, di Turismo i di Komersio a baha na Hato te dies pa dies. For di banda di shet’or komunidat haitiano tabata para kla rònt di e kiosk na Brionplein pa risibí e presidente i su delegashon.

Bandera haitiano
E enkuentro tabata planeá pa och’or djanochi. Pa e okashon a dòrna e kiosk ku sinta kòrá i blou i ku un bandera haitiano grandi. Hopi kabayero tabata bistí na flus i dashi pa e okashon speshal aki.

Pa hasi e espera largu mas agradabel e grupo folklóriko i e orkesta a presentá algun be i e organisadónan di e enkuentro a papia ku públiko na kreol.

Unidat
Haitianonan, ounke nan tin hopi tempu bibá na Korsou ta sinti hopi unidat ku Haiti. Daniel ku a nase na Les Cailles, pero ku tin 13 aña ta biba na Kòrsou tin un negoshi di paña aki ku mayoria di kliente haitiano.

Na momentonan manera esaki, ora e ta entre su paisanonan i por papia kreol ku tur hende rònt di dje e ta sinti masha nostalgia, pero no tin kestion di bai bèk. “Mi ta biba bon aki i ademas kasi henter mi famia a sali for di Haiti”, asina e ta konta. Pé ta hopi speshal pa por topa e presidente di asina seka.

No ta papia kreol mas
Yunan di migrante haitiano hopi be no ta papia kreol òf franses mas, pero nan ta papia papiamentu hulandes i ingeles ekselente. Esaki mester, asina Micheletta di 15 aña ta bisa, pasobra e ke bira dòkter di mucha i banda di su sifranan ekselente na e skol di vsbo ku e ta bai awó, e ta pèrkurá pa su konosementu di idioma tambe ta perfekto.

“Despues mi mester bai havo i vwo i kaba sigui studia na Hulanda òf Estádos Unídos, ke men di mes mi mester papia mi idiomanan bon”, e ta bisa masha sabí.

Diaspora
El  a bini Brionplein ku su mama pasobra e ker a mira presidente Martelly. E ta bisa ku awó si a bira tempu pa e bai bishitá famia di su mama na Haiti, pasobra el a nase aki i nunka no a bai Haiti. El a tende asina tantu di e pais ei. E ke bai einan ku fakansi porfin. Ma e ke bai Canada tambe pasobra einan famia di su tata ta biba.

Presidente Martelly ta perkurá pa na tur pais ku e bishitá e drenta den kontakto ku hende di e diaspora haitiano. Ku e plaka ku nan ta manda Haiti nan ta un faktor importante pa ekonomia haitiano.

Presidente haitiano ta keda Kòrsou te awe nochi i ta sigui un programa di bishita den bario i presentashon komersial