Kiko ta etiketa i kiko ta bon manera? Kiko ta miho pa bo no hasi ora bo bai hunga seka un mucha di bo klas? Por lesa e kontesta riba e pregunta aki i mas pregunta den e buki 'Etikèt i krokèt di Kaylee' di Denise de Jongh-Rekwest. Dia 3 di yüli a presentá e buki na Antillenhuis na Den Haag.

Segun ku nan lesa e buki, mucha, manera den wega, por siña tur kos tokante bon kondukta, norma i balor. "Etikèt i krokèt di Kaylee" ta sigui e buki "Kaylee i su primunan ku fakansi na Kòrsou". E buki ta sali na hulandes i na papiamentu.

De Jongh -Rekwest a haña su inspirashon seka su yu muhe Kaylee i su amigunan di skol. "Nan tin tur sorto di eksperiensha na skol." E ta konvensí ku for di edat hóben etiketa ta importante. "Pa bo bira eksitoso den bida etiketa tambe ta importante." E palabra etiketa tábatin mester di poko atenshon. Tábatin mucha ku a kere ku etiketa ta un rakèt òf un krokèt.

E eskritora ta mira ku su bukinan ta impreshoná mucha. Nan ta asta koregí nan mayornan ora esakinan hasi algu ku no ta korekto. Aktualmente ta usa su prome buki komo material pa skol na Boneiru i Korsou. Ta algu ekstra riba nan edukashon. Aworaki De Jongh-Rekwest ta trahando riba un buki di etiketa pa adulto.

E minister plenipotensiario saliente Paul Comenencia i Scarlet Windster di redakshon karibense di Wereldomroep tabata padrino i madrina di e buki. Dia 25 di yüli lo presentá e buki na Korsou.