Skirbí pa Ronald A. Muyden

Ortografia i lista di palabra na Papiamentu, kariñosamente yamá 'Buki di Oro' ta un echo.
Buki di Oro ta e buki ku por haña e manera korekto pa skirbi papiamentu.
E buki aki ta un produkshon di Fundashon pa Planifikashon di Idioma na Kòrsou i ta di kompará ku 'het Groene Boekje' pa idioma hulandes.
Na yüni e aña aki a tene presentashon di Buki di Oro i djamars 13 di òktober último esaki a tuma lugá na Hulanda.

Den luna di òktober minister di Enseñansa di Antia Hulandes, señora Omayra Leeflang, a hasi uso di e oportunidat pa prensentá Buki di Oro na Kas di Antia durante su bishita na Hulanda. Ku presentashon di e Buki di Oro na Den Haag minister Leeflang kier duna komunidat Hulandes Karibense na Hulanda mas orguyo propio.
"Papiamentu no ta un dialekto, e ta un idioma ofishal ku ortografia ofishal," asina e mandatario a bisa enfátikamente.

Ruben Severina, presidente di fundashon SPLIKA, ta hopi kontentu ku presentashon di Buki di Oro. Na promé lugá señor Severina ta haña ku porfin tin un lei na Antia ku papiamentu ta un idioma ofishal, i na di dos luga pasó awor tin un lista ofishal kon pa skirbi papiamentu korekto.
Señor Severina ta sigui bisa ku e ta spera ku e Buki di Oro ta baha e diskushon kon pa skirbi papiamentu.

E presentashon aki a habri mas porta pa fundashon SPLIKA aki na Ulanda riba terenu di papiamentu. Den kurso di tempu e fundashon kier purba duna papiamentu un posishon aun mas mihó aki na Hulanda.

Skucha Ronald Muyden den kòmbersashon ku Omayra Leeflang i Ruben Severina na papiamentu