E aña akí a otorgá Premio Nobel di Pas na Barack Obama, presidente di Estádos Unídos. E komité konserní, ku su sede na Oslo, kapital di Noruega, a anunsiá e notisia akí.

E komité ta gab'é pa su esfuersonan riba tereno di desarme mundial. Tambe ta elogiá su intentonan pa trese pas na Medio Oriente. Obama a krea un klima nobo den diplomasía internashonal, asina e Komité di Premio Nobel ta bisa.

Premio Nobel di Pas ta enserá ademas un suma di un mion di euro. Barack Obama lo risibí su premio na Oslo dia 10 di desèmber próksimo.
 

E presidente merikanu a keda sorprendí i el a bisa ku p'e ta un gran onor ku ta otorg'é Premio Nobel di Pas.
Obama a sigui bisa: "Ku tur frankesa mi tin ku bisa ku mi no meresé e premio." E no ta konsiderá e kondekorashon komo rekonosementu di loke el a presta, sino mas bien komo  insentiva pa drenta den akshon.
 

Komunidat internashonal a reakshoná en general ku aprobashon riba e echo ku a skohe Obama.  Un di e proménan ku a bis'é pabien tabata Nelson Mandela, e èks presidente di Suráfrika, ku a lucha kasi henter su bida kontra Apartheid, e sistema di segregashon di rasa ku tabata eksistí antes na e pais.

Despues a drenta felisitashon di entre otro lider kubano Fidel Castro. El a papia di un paso positivo. E no ta konsiderá e premio komo homenahe na e presidente merikanu, sino mas bien komo un señal di krítika di e 'polítika genosidal di predesesornan di Obama'.

Presidente ruso Dmitri Medvedev ta spera ku e kondekorashon lo nigiká un estímulo adishonal pa un klima nobo den polítika internashonal i pa seguridat na mundu.

Presidente Ahmadinejad di Iran ta spera ku e premio lo stimulá Obama pa deshasí di e inhustisia na mundu.

Di otro banda: Adolfo Pérez Esquivel, ganadó argentino di Premio Nobel a kritiká desishon di komité di Premio NObel un tiki den deklarashon pa Wereldomroep. E ta di opinion ku Obama ta di bon boluntat wèl, pero ku e no a hasi nada konkreto ainda pa pas mundial. Na 1980 Peréz Esquivel mes tambe a risibí Premio Nobel di Pas pa su lucha kontra e hunta militar argentino di e tempu ei.