Loudrieth Langgut Leocaria, mihó konosí komo Mai i Godfried Wanga a risibí MAAPP Award pa nan trabou di boluntario apashoná i apnegá, i pasó semper nan ta pará kla pa yuda hende.

Ayera nan a risibí e premio di Movimentu Antiano i Arubano pa Promové Partisipashon (MAAPP) pa tur loke nan a nifiká pa komunidat antiano i rubiano na Hulanda. Mai ta hende di misa i semper e ta resa pa esnan den nesesidat. El a guia víktima antiano di e atentado durante aña di la Reina na Apeldoorn 2009. Godfried Wanga tin años kaba ta yuda ken ku mester ku hopi perseveransha.

Mai no tabata sa di antemano ku lo el a risibí e premio. A invit'é ku un preteksto pa asistí na entrega di MAAPP-award. Komo ku Mai no tabata sinti su kurpa bon, el a duda un ratu si e lo bai. E no tabata sa nada te na momento ku el a ripará ku tabatin un potrèt di dje riba esenario. 

'Dikon mi potrèt ta eiriba?', el a pensa. Mai ta bisa ku nan a kohé for di base. E no a pensa ku e lo a haña un premio pa su trabou di boluntario. 'Egt loke bo ta hasi, bo no ta hasié pa haña nada'.

Mester tin un promé biá
Godfried Wanga tampoko no tabata sa delantá ku e lo risibí e premio. Raymond Labad, presidente di MAAPP a kombersá un par di biaha kuné sin bisa ku Wanga lo haña e premio konsistiendo di un bròsh di oro. Ta te ora ku Wanga a bisa ku e no ta logra di ta presente na e evento di MAAPP, Labad a disidí di splik'é kiko lo a bai sosodé. E ora ei Wanga e disidí pa ta presente.

'Esaki ta algu, un biaha e ta sosodé'. Wanga ta bisa ku meskos ku na Weganan Olímpiko, bo ta traha pa basta aña anto un dia bo ta logra. P'e e premio ta algu ku 'hamas no ta bai pèrdí. Mas aleu Wanga a deskribí ganamentu di e premio komo un momento hopi hopi grandi.