Organisashon dje kuerponan polisial na e paisnan nobo lo bira un 'wesu duru'. Aparte di esei  kriminalidat na Sint Maarten ta un problema. Esaki di akuerdo ku gezághèber interino di Kòrsou, Magali Jacoba, tokante loke ta ward'é awor ku e ta bira e minister nobo di Hustisia na Antia.

Su partido PAR a proponele komo kandidato ya ku minister David Dick a bira diputado di Asuntunan Ekonómiko i di Turismo pa Teritorio Insular di Kòrsou despues di retiro di Eugène Rhuggenaath. Na e momento akí manera ta kustumber, ta hasiendo investigashon di antesedente. Si for di esaki no surgi inkumbiniensia, Magali Jacoba lo asumí e funshon komo minister mas pronto posibel.

Di 1995 te 1997 Jacoba tabata miembro di Konseho Insular pa PAR, e partido ku el a yuda lanta. Tambe el a fungi komo trahadó di maneho pa e promé minister pa PAR dje tempu ei, esta Miguel Pourier. Despues ku el a biba un temporada na Hulanda, el a bira gezághèber interino na 1997.
 

Solushonadó di problema
Jacoba ta bin originalmente for di seno di enseñansa ( 'mi beibi' manera e sa yam'é tambe), asina ta ku ora a pidié pa bira minister di Hustisia tabata un sorpresa p'é. A solisitá su servisio sobretodo pa resolvé problema, algu ku e gusta mashá i ku e ta bon den dje.
 

Relashoná ku Hustisia el a menshoná komo 'problema' entre otro prizòn na Kòrsou i na Sint Maarten, e diferente proyektonan di mehorashon den seno di Ministerio Públiko, polis i e Plan di Seguridat den kuadro di e kambionan estatal.

Un di su otro kalidatnan ta, asina e mes di: uni hende i laga nan realisá ku mester bin kambio. E kalidat akí lo sirbi bon por ehèmpel den e proseso di kambio serka polis na Kòrsou ku resientemente a pone David Dick manda un karta urgente, pasobra e ta kana muchu
slo.

Garoshi den kareda
Ta difísil subi rib'un garoshi ku ta den kareda kaba, asina Jacoba ta respaldá, pero denter di PAR ta nòrmal pa reuní semanalmente pa deliberá ku otro riba vários tereno di maneho. Esaki ta pone ku akiratu e ta bon na altura di loke ta sosodé denter di hustisia i pa sa ken ta e outornan. E no ta konsiderá hustisia komo un dòsjei ku ta duna doló di kabes. "Nò, sigur ku nò. Mi gust'un reto, mi heful ta bisámi ku ta bon."

David Dick a enfrentá basta krítika komo minister, partikularmente ku su maneho di prizòn. E mehorashonnan na Bon Futuro lo a bai muchu pokopoko. Pero segun Jacoba, Dick a hasi hopi. Sí ta asina ku e no a komuniká su maneho sufisientemente, loke podisé ta un punto negativo. Jacoba ke hasié di un manera diferente. Pasobra si hende no haña sufisiente informashon, nan lo sinti nan mes insigur òf nan por kere ku kos no ta kana bon.
 

Kuerponan polisial
Su antesesor a hasi gran parti dje trabou kaba relashoná ku kambionan estatal. Loke mester sosodé mas bien ta terminá e diferente trayektonan, ounke formashon dje kuerponan di polis nobo lo bira un 'wesu duru' konkubaibin.

Tambe e lo sigui duna Sint Maarten antenshon speshal. "Sint Maarten ta un problema. Mi stima e isla i mi ta haña ta mashá lástima pa mira kon sierto tipo di kriminalidat ta oumentá. Sint Maarten ta keda un yuchi, ku mester kuida ku kariño sí pa dun'é forsa pa futuro", segun Magali Jacoba.