Kiko ta skem?
Kriminalnan ta usa sistema pa gara e informashon riba bo pas di banko i bo kódigo di pen. Ku e informashon aki nan por kopia e pas i us’é –hopi be den eksterior – pa lanta plaka òf paga.
Ora ta ketu nan ta tofer ku e mashin di plaka pa komete froude. Dilanti di e apertura di e mashin nan ta pone un boka falsu ku ta lesa e karchi i kopi’é. Ku un kamara chiki òf un hende ku ta lur bo, ta wak bo sifranan di kódigo. Ku e datonan aki ta kopia bo pas i pluma bo kuenta.
Den restorant i negoshi kaminda bo mester entregá bo karchi pa suaip tambe por kopia e informashon di e karchi i buska moda di sa bo kódigo pa por kometé froude.
Kon evitá
Hopi banko ta pone un ‘smartchip’ riba nan pas, no por kopia e pasnan aki.
Banko ta konsehá pa kompara e boka di e mashin di plaka ku e potrèt di e boka riba e aparato.
No duna bo pas pa bai suaip i tapa ora bo primi e sifranan di e kodigo.
WILLEMSTAD – Polis di Kòrsou djadumingu anochi banda di dies or a arestá dos hòmber bou di sospecho di a skem e mashin di plaka di banko MCB na Zuikertuintje.
Esaki bosero di polis Reggie Huggins a laga sa. A atrapá e hòmbernan mientras ku nan tabata tofer ku e mashin i nan a hui den un outo. Djis despues a arestá e hòmbernan. Nan tabatin un kantidat di karchi di banko den nan poseshon.
Skemer
Siman ku a kaba skemer a ‘traha’ riba dos mashin di plaka di MCB – un na Centrum Supermarket Piscadera i un na altura di Klipstraat na Otrabanda – i un mashin di Girobank na Hotel Breezes. Aktualmente ta investigá si e sospechosonan ku a arestá ta involukrá den esaki.
E wikènt aki Girobank, SFT i RBC Royal Bank (RBTT) pa medio di un mensahe di prensa a atvertí ku kliente mester ta konsiente ku tin skemer aktivo na Kòrsou. Bankonan a tuma diferente medida preventivo.
Limitá uso
Asina kliente di SFT por lanta un máksimo di 250 florin pa dia seka un mashin di plaka i e banko a para tur transakshon ku ‘debit card’den eksterior. Ademas e banko ta konsehá pa por lo pronto limitá uso di mashin di plaka. Por lanta mas plaka na kaha di e banko.
Girobank a blòkia karchi ku a usa na mashin di plaka ‘kontaminá’. Nan ta konsehá nan klientenan pa sigui aktividat riba nan kuenta bon via e sistema di ‘Mobile Banking’.
Email this Article
Printer-friendly version
Post new comment