Kòrsou ta purba saka kara atrobe e aña akí durante e di 27 ‘World Police Indoor Soccer Tournament’. Mas o ménos 160 ekipo di 44 pais ta partisipá na e kampionato mundial di futbòl di sala akí. Entrenadó Orlando Reenis, mihó konosí komo Broertje, ta kontentu ku e oportunidat ku e ekipo di Kòrsou ta haña pa partisipá pa di shete biá na e torneo mundial di ‘voetzaal’ di polis.

Skibí pa Belkis Osepa

E 160 ekiponan di futbòl di sala ta kompetí te ku djaweps awor pa e título di kampion mundial. Tin tim di tantu hende hòmber komo hende muhé. E torneo ta repartí den tres kategoria: femenino, veterano i senior. Kòrsou ta partisipá den e kategoria senior ku un ekipo ku ta konsistí di hende hòmber só. Reenis ta di opinion ku e tim di Kòrsou ta fuerte i kla pa hunga e wega. “Nos ta den poule G ku entre otro ekiponan di Estlandia, Hulanda, Rumania, Bèlgika i Hungria. Algun tim ta fuerte, pero nos tambe tin eksperensha di seis ana i nos a bin bon prepará.” Kòrsou lo hunga awe shete partido di futbòl i mayan e sobra weganan den e di promé tanda.

Polis
E tim di Korsou no ta konsistí di polis só. Reenis ta splika ku e promé aña ku Kòrsou a partisipá na e torneo, a bai ku polis só. Pero e ekipo tin entre tantu otro miembronan ku no ta agente polisial. Reenis: “E ekipo a bira un fundashon ku tambe miembronan ku no ta polis. Nan ta hunga henter aña na Kòrsou huntu ku e miembronan ku sí ta polis. Pues nos tin un ekipo variá.”

Na Kòrsou no tin futbòl profeshonal, pero si semi-profeshonal, segun Reenis. E ekipo di futbòl di sala di Kòrsou tin algun miembro ku ta hunga futbòl semi-profeshonal. Pero e biaha aki aparte di un, niun no por a biaha pa Hulanda pa partisipá na e torneo. Futbolista Stefania ta e úniko ku ta tambe agente polisial ku ta hunga futbòl den divishon mas haltu na Kòrsou. Sobra miembronan ku ta hunga riba e nivel ei, no a alkansá pa forma parti dje tim ku a biaha pa Hulanda.

Meta
Na 1994 e ekipo di Kòrsou a terminá na di kuater lugá for di 96 ekipo ku a partisipá. Tur sobra añanan Kòrsou a kaba den e delaster diesseis ekiponan. E aña aki tambe e tim ta spera klasifiká pa siguiente bueltanan. Pero gana no ta e úniko meta dje ekipo di Kòrsou, segun Reenis. “Naturalmente nos ke gana despues ku nos a hasi esfuerso bula nuebe ora i paga un biahe ku no ta barata. Pero mester probecha di tur oportunidat ku tin. Tin 44 pais representá den 160 ekipo. Bo ta forma parti di un famia grandi di polis na mundu. Nos ta interkambiá ku otro i partisipá na eventonan sosial entre otro kaminda polis ta presentá den uniform.”