Parlamento ulandes ta plèita riba elaborashon di e banko di dato nashonal pa hóbennan di riesgo. Minister André Rouvoet di Hubentut i Famia ta ninga di registrá hóbennan problemátiko antiano a base di etnisidat.

Rouvoet ta ninga di duna ámtenar aprobashon pa registrá hóbennan di riesgo antiano den e banko di dato kontrali na promesanan anterior. Lo registrá hóbennan, ku ta kore hopi riesgo di drenta mal kaminda, den un sistema di atvertensha segun algun kriteria. Esei mester ta sufisiente, segun Rouvoet.

Kordinadó antiano
Parlamentario pa CDA Mirjam Sterk ta haña ku Rouvoet mester kumpli ku promesanan anterior. E ta abogá e importansha pa menshoná pasado kultural den dunamentu di ayudo na hóbennan. Un grupo di hóben lo ta mas vulnerabel pa sierto problema debí na nan desendensha étniko.

Banda di esei e ke pa munisipionan ku hopi antiano apuntá un kordinadó munisipal pa hóbennan antiano. E ámtenar akí mester atendé spesífikamente ku problemanan di hóbennan antiano i e mester haña mas bista riba e grupo en kuestion.

Lista di notifikashon
Parlamentario Jeroen Dijsselbloem di PvdA ta desapuntá ku ámtenarnan munisipal no tin mag di intervení: "Munisipionan ku hopi antiano mester por sigui ku enfoke di e problemanan. "Anteriormente a kita e asina yamá Verwijsindex Antillianen (VIA) for di mesa despues di protesta di komunidat antiano i di polítiko.

Na su lugá a amplia e lista di notifikashon di e Verwijsindex general ku kriterianan manera mudansa di un munisipio pa otro i mamanan soltero. E dos kosnan akí ta problemanan ku ta bin hopi dilanti serka hóbennan di riesgo antiano.

Dijsselbloem: "No por wak den e índise general ku ta trata spesífikamente di hóbennan antiano di riesgo. Ta registrá nan komo hóbennan problemátiko, pero no a base di etnisidat." Dianan benidero parlamento lo sigui debatí riba e Verwijsindex. PvdA i CDA lo entregá un moshon riba esaki.