E plannan pa un kèmpùs di beisbòl na Kòrsou, ta bira dia pa dia mas konkretu. E kompleho ku un stadion grandi lo bini serka di aeropuerto Hato. Presidente John Witte i su fundashon ta embolbí den e proyekto. For di Hulanda e ke hasi algu pa talentonan di beisbòl antiano.

Witte ta tambe presidente di e tim ku nèt a kaba bira kampion di beisbòl hulandes, L&D Amsterdam. E ta bisa ku a firma un akuerdo ku aeropuerto Hato pa uso di e tereno. Asina e plannan lo bira mas konkretu. "E kompleho lo bini riba un seru", segun Witte.

Segun e plannan lo bin sinku fèlt di beisbòl, un stadion ku seismil lugá i sinku fèlt pa trein. Por amplia e stadion te 15 mil lugá. "E kompleho ta ofresé posiblidatnan pa organisá torneonan i natural pa desaroyo di talento hóben di beisbòl na Kòrsou."

Talento tòp
Beisbòl na Hulanda ta konsistí pa un gran parti di hungadónan antiano. witte ta haña ku ta tempu pa for di Hulanda hasi algu. "Si bo tin asina tantu talento tòp, e ora ei bo mester di akomodashon tambe, kaminda nan por desaroyá nan talento."