Djaluna 12 di òktober e ministernan di Enseñansa Omayra Leeflang (Antia ulandes) i Ronald Plasterk (Hulanda) a firma un protokòl na Den Haag pa enseñansa superior na Antia.

Hulanda ta pone 690.000 di euro disponibel pa hasi enseñansa superior mas atraktivo na e islanan i pa para e huida di konosementu (brain drain) for di Antia. Por usa e plaka aki entre otro pa beka adishonal pa studiantenan ku ta presta bon na Universidat di Antia i ku ta sosialmente aktivo den komunidat.

Ta teme ku mas i mas hóben ku ta kaba skol sekundario i ta bai Hulanda, pa sigui studia, no ta regresá mas. Ku e plaka èsktra mester hasi enseñansa mas atraktivo na e islanan mes, pa e konosementu 'keda kas'.

Minister Leeflang ta positivo. "Ultimo aña 400 studiante a bai Hulanda miéntras ku 1300 a disidí di studia na Kòrsou. Poko poko pero sigur nos ta hañando mas grep riba e kos akí. A tene un arsenal di akshon i e suma di plaka akí ta un di nan." 

Sentro di konosementu.
E meta ta pa kombertí UNA den un sentro di konosementu regional i pa laga e universidat krese bira un sentro den seno di Reino, spesialisá den estudio di desaroyo di komunidatnan chikí. 

Ku e perspektiva di kambio estatal e ta kumbiní Hulanda tambe si Kòrsou i Sint Maarten ta gosa di bon enseñansa superior. Ademas, na momentu ku Saba, Statia i Boneiru (Islanan BES) bira munisipio ekstraordinario na 2010, hopi hóben di e islanan aki lo sigui ku enseñansa avansá na universidatnan na Kòrsou (UNA) i na Sint Maarten (USM).

Diario La Prensa di Kòrsou a agregá ku for di otro aña lo evaluá resultadonan di e inisiativa aki. A base di esei lo disidí si ta sigui finansi'é.

Ministernan Plasterk i Leeflang a palabrá tambe pa publiká un gramátika básiko di papiamentu pa Kòrsou,  Boneiru i komunidat di abla papiamentu na Ulanda, meskos ku ta tumando lugá pa Aruba. Esei mester ta e promé paso pa yena un union di papiamentu den reino, asina nan a bisa.