Sinku skol superior na siudatnan grandi ta haña plaka èkstra di gobièrnu pa engrandesé èksito di estudio dje alumnonan alóktono.  A registrá esaki dia 24 di ougùstùs den un kombenio entre e skolnan i minister Plasterk di Enseñansa. E skolnan ta haña pa e kos akí máksimal binti mion euro tres aña benidero. 
 
Hogeschool Rotterdam ta usa e plaka èkstra pa mehorá algun abilidat tékniko manera aritmétika i idioma. Tambe lo bai guia studiante mas intensivo. Gerard van Drielen dje kolegio di direktiva di Hogeschool Rotterdam: "Hopi studiante alóktono t'e promé di famia ku ta sigui enseñansa haltu. Tin biá no tin bon akohida i guia na kas i e studiantenan ta pará nan só."
 
E minister ta laga skolnan superior en prinsipio liber pa gasta e plaka manera nan ke. Su koseho ta sinembargo: "Hinka mas tantu posibel den kontakto primario ku e studiantenan. "Na Rotterdam ta pone studiantenan alóktono den kontakto ku hende di mésun desendensia ku ta fungi komo un modelo di kondukta, pasobra nan a pasa den nan estudio eksitosamente. "Ta un kuestion tambe di duna konfiansa i sinti bo na kas", segun Van Drielen. 
 
Tur studiante
Mester bisa ku e guia intensivo no ta pa studiante alóktono só. Van Drielen: "Tur studiante ta haña entrante e aña di estudio akí un kombersashon na komienso di nan estudio tokante loke nan ta bon i ménos bon den dje. A base di esei por ofresé nan tambe skol durante zomer òf enseñansa adishonal." Studiantenan ku problema ta haña mas guia: "Mas o ménos dies biá pa aña."
 
Mas studiante alóktono
E kantidat di studiante alóktono no oksidental a oumentá bastante delaster dies aña. E kantidat di alóktono na skolnan di hbo i universidat tabata aña pasá 12.819 i na 2007 11.725. Apesar dje desaroyo akí a resultá ku e èksito di estudio di studiantenan alóktono ta ainda mas abou ku di studiantenan outóktono. Na hbo 26 porshentu di studiantenan alóktono ta stòp ku nan estudio i bou di outóktono e porsentahe ta 23. Na universidatnan e parti alóktono no oksidental ku ta stòp ta 14 porshentu, kontra 10 porshentu di tudiante outóktono.
 
Skolnan superior huntu ku Ministerio di Enseñansa a stipulá e sifranan ku nan ke alkansá na 2011. Te 2011 ta repartí e bùdjèt a base di e kantidat di studiante alóktono. Despues dje tempu ei ta tene kuenta tambe kon leu e skolnan superior a logra e sifranan stipulá. Lo rekompensá skolnan superior ku prestá bon finansieramente i esnan ku funshoná malu lo haña ménos bùdjèt despues 2011.